मानव अधिकारवादी नेता नाप पूर्व सभामुख दमनाथ ढुंगाना आः झीगु न्ह्यःने मन्त । अय्न वय्कलं स्वीकार यानादीगु विचाः व ज्याखँपाखें स्थापित मूल्य मान्यता व वय्कःया योगदान न्ह्याबलें झीसं लुमंकेमाः।

मनुखं  थःगु भिंगु कर्मं हे पृथ्वीया शरीर भस्म जुइधुंकाः नं मनूयात म्वाकातइ । छाय्धाःसा अज्याःपिं मनूतय्गु योगदान देय् व जनताया सार्वजनिक लुमन्तिइ जुयाच्वनी । सार्वजनिक पदय् च्वनादीगुलिं जक वय्कःयात लुमंकेगु वा लुमंकेमाःगु धइगु मखु । छगू ला वय्कः ८३ दँया जीवनय् स्वदँ तक (२०४८ निसें २०५१ तक) प्रतिनिधिसभाया सभामुख जुयादीगु खः। व

य्कःयात लुमकेमाःगु धइगु सभामुख जुयादीगु इलय् वय्कलं तयादीगु विचाः व म्हितादीगु भूमिकां उगु पदया मर्यादा थहां वंगु खः । तर वय्कःया व्यक्तित्वया म्हसिका नेपाःया समाज, मानव अधिकार व सीमान्तकृत समुदायया लोकतान्त्रिक व प्रगतिशील रुपान्तरणया पक्षय् हरेक आन्दोलन व संघया पक्षधर कथं निर्माण जूगु धकाः धाय्छि।

शान्ति व न्यायया निंतिं मदिक्क सः तयाच्वनादीम्ह वय्कःया छवि न्ह्याबलें न लुमकाबी । थ्व ल्याखं स्वल धाःसा दमननाथ ढुंगाना नेपाः व नेपाली समाजय् सदां म्वानाच्वनी। २०४६ स लोकतन्त्र पुनःस्थापना जुइधुंकाः स्वय्गु खःसा आःतक यक्व मनू प्रतिनिधिसभाया सभामुख जुइधुंकूगु दु।

प्रधानमन्त्रीं थःगु खँ नाप व पार्टीया हितय् ज्या याय्त स्वइपि जक सभामुख दय्केगु व इनापया आधारय् थःगु भूमिका निर्वाह याइपिं सभामुखत दय्केगु स्वइ । तर ढुंगाना सत्तारुढ दलया उत्पीडनयात थाय् मब्यूम्ह सभामुख जूगु दु । संसदीय व्यवस्थाय् सरकार सत्तारुढ दलया व संसद विपक्षी दलया खः धका दमनाथ ढुंगानां धायेगु याः नाप वहे कथं न ज्या याःगु खनेदु । वया लिपा जुइ सभामुख जूपिंस थ्व ब्यवहारय् याःगु खनेमदु । पार्टीया हितसिबें च्वय् थहां वनाः संसदीय व संवैधानिक मूल्य मान्यतापाखें विचलित मजूसे थःगु भूमिका निर्वाह यानादिल।

राजनीतिक विवाद समाधान यायेगु मू थाय् संसद खः धइगु मान्यताप्रति वय्कःया निष्ठाया कारणं वय्कलं फुक्क विपक्षी दलतय्त संसदय् हय्त प्रेरित यानादीगु खः। वय्कःया भूमिकाया हुनिं सरकारं ज्या याय्माः, संसद प्रतिपक्ष जुइमाः धइगु मान्यता दुगु खः। राजनीतिक दलया शीर्ष नेतातय्गु कारणं गबलें गबलें संसदया आलोचना जुइगु अवस्थाय् वय्कःया भूमिका महत्वपूर्ण जक मखु, शिक्षाप्रद नं जूगु दु।

कांग्रेस पार्टीपाखें प्रतिनिधिसभाय् निर्वाचित जुयादीम्ह ढुंगाना सभामुख जुइधुंकाः कांग्रेस पार्टीयात समस्या वःसां वय्कलं गुगु अडान कयादीगु खः, व वय्कःया इमान्दारिताया संकेत जुइ। थ्व भूमिकाया माध्यमं वय्कःया व्यक्तित्व झन जक थहां वंगु दु । थुकथं लोकतन्त्र धाःपिंसं वय्कःपाखें लोकतन्त्र छु खः व उकिया अर्थ छु खः धइगु सीके फइ। वय्कःया जीवनं प्रेरणा काय्फइ कि लोकतन्त्रय् थीथी बिचाःयात निषेध मदु।