येँ महानगरपालिकां सितिकं भिडियो एक्सरे सेवा न्ह्याकीगु जूगु दु। महानरपालिकां स्वास्थ्य बीमा ज्याझ्वः न्ह्यानाच्वंगु वडाया स्वास्थ्य प्रवर्धन केन्द्रपाखें नागरिकयात थूगु सेवा न्ह्याकेत्यंगु खः।

स्वास्थ्य विभागया प्रमुख दीपक केसीया कथं वडा नं १२, १६ व ३० पाखें थूगु सेवा न्ह्याकेत्यंगु खः। आइतबाः व सोमबाः वडा नं १२, १९ व १४ यापिंत वडा नं १२ य्, मंगलबाः व बुधबाः वडा नं १६, २६ व २७ यापिंत वडा नं २७ य् अथेहे बिहीबाः व शुक्रबाः वडा नं १० व ३० यापिंत वडा नं ३० य् च्वंगु स्वास्थ्य प्रवर्धन केन्द्रय् थूगु सेवा बिइत्यंगु दु।

स्वास्थ्य बीमा ज्याझ्वः न्ह्यानाच्वंगु फुक्क वडाय् भिडियो एक्सरे मेसिन स्वायेधुंकूगु दु। सेवाग्राहीया चाप अप्वःया वंलिसे सेवा तब्याकाः यंकेगु वय्कलं धयादिल। कामपां वडा नं ८ या रामघाट प्राथमिक स्वास्थ्य केन्द्र, वडा नं १४ बल्खु, वडा नं १९ कंगः, वडा नं २६ लैनचौर अथेहे वडा नं ३० ज्ञानेश्वर, वडा नं १६ बालाजु, वडा नं २७ महाबू, वडा नं १२ टेकु व वडा नं ७ चाबहिया स्वास्थ्य प्रवर्धन केन्द्रयात न्हापांगु स्वापूतय्गु थाय् कथं क्वछ्यूगु दु।

Categorized in राष्ट्रिय