विसं २०७२ या तः भुखाचं क्षति जुयाः पुनःनिर्माण जूगु ऐतिहासिक धरहरां छगू वाः दुने १४ लख ७० द्वः राजस्व मूंगु दु।

थ्व हे मङ्सिर ९ गतेनिसें सर्वसाधारणया निंतिं शुल्क कया चायेकूगु धरहरा गःवपिनिपाखें १६ गते आइतबाः तक १४ लख स्वयां अप्वः राजस्व मूंगु खः। कामु आयोजना निर्देशक प्रकाश अर्यालं बुधबाः बन्द जुया व मेगु दिं न्हिथं थ्यं मथ्यं द्वःछि व निसलं धरहरा गः वःगु धयादिल। “९ गतेनिसें आःतक च्याद्वः व स्वसः व १६ म्हेसिनं धरहरा गये धुंकूगु दु। थुकिइ १२ दँ क्वय्या मचातय् ल्याः दुथ्याःगु मदु”, वय्कलं धयादिल, “सुथे साढे १० निसें ३ तक धरहरा गयेगु व्यवस्था याना तयागु दु।

चिहाकःगु इलय् नं नागरिकया गाक्कं उपस्थिति खनेदत। ई मगाना थन वपिं सकसितं टिकटया व्यवस्था यायेफयाच्वंगु मदु।” सुथंनिसें सनिलय् तक धरहरा गयेगु व्यवस्था यायेफूगु खःसा न्हिथं द्वःछि व न्यासः मनुतय्सं धरहरा गयाः अवलोकन याइगु अनुमान यानागु अर्यालं धयादिल। धरहरा गयेत छम्ह मनुखं निसः दां पुलेमाः। ब्वनामि, ज्याथः जिथी, मस्त, अपाङ्गता जुपिं मनुतय्त शुल्कय् ५० प्रतिशत छ्यापं बियातःगु दु।

सार्क राष्ट्रपाखें वइपिं पर्यटकतय्त म्हतिं न्यासः व सार्कबाहेक राष्ट्रं वइपिन्त म्हतिं द्वछि दां तोके यानातःगु दु। विशिष्ट संरचना सञ्चालन व व्यवस्थापन विकास समिति गठन आदेश, २०८१ कथं दां कयाः थ्व हे मङ्सिर ९ निसें धरहरा गयेके बिउगु खः। व सिबे न्ह्यः थ्व हे मङ्सिर ६ गते च्वंगु मन्त्रिपरिषद् बैठकं धरहरा चायेकेगु व उकिया निंतिं कायेगु शुल्कयात नं स्वीकृति बियेगु निर्णय याःगु खः। सहरी विकास मन्त्रालयया प्रस्ताव कथं उगु निर्णय जूगु खः। थन पार्किङ याःसा प्यचाः घःचाःया निंतिं घौछिया २० तका व निचाः घःचाःयात १० तका शुल्क तोके यानातःगु दु।

अथे हे, धरहरा परिसरय् दुहां वनेया निंतिं धाःसा ५० तका शुल्क तोके यानातःगु धाःगु दु। धरहरा स्तम्भय् राष्ट्रिय महत्वया विज्ञापन यायेत घौछिया न्याद्वः तोके यानातःगु दु। व्यावसायिक भिडियो छायाङ्कनया निंतिं घौछिया न्याद्वः व फोटो खिचेयायेगु खःसा घौछिया द्वःछि तका शुल्क पुलेमाः।

Categorized in राष्ट्रिय