चीनया औपचारिक भ्रमणय् वनाच्वम्ह प्रधानमन्त्री केपी शर्मा ओलीं बेल्ट एण्ड रोड इनिसियिटभ (बिआरआई) पाखें नेपालं लाभ काइ धकाः धयादीगु दु।

थनया पेकिङ विश्वविद्यालयय् जूगु ज्याझ्वलय् प्रधानमन्त्री ओलीं नेपाःया विकासय् चीनया क्वातुगु साथ दइगु व राष्ट्रपति सी चिनफिङया दुरदर्शी नेतृत्वय् न्ह्याःगु बिआरआई परियोजनापाखें निगुलिं देय् दथुइ थ वं थः सम्बन्ध अझ क्वतुइगु भलसा कयादिगु दु।

प्रधानमन्त्री ओलीं वइगु सन् २०२५ य् नेपाः व चीन दथुइ कूटनीतिक सम्बन्ध नीस्वंगु ७० दँ दइगु झ्वलय् निगू देय्या उच्चस्तरीय भ्रमण कालबिल जुयाः निगु देय् दथुइ सम्बन्धय् न्हूगु आयाम जुइ धकाः धयादिगु खः।प्रधानमन्त्री ओलीं पेकिङथेंजाःगु पुलांगु विश्वविद्यालयं नेपाःया शैक्षिक विकासय् नं योगदान बिइफइ धकाः धयादिल।

प्रधानमन्त्री ओलीयात विश्वविद्यालयया अध्यक्ष प्रा गोङ छिहुङं लसुकुस यानादीगु खः। ज्याझ्वलय् प्रधानमन्त्री नेतृत्वया प्रतिनिधिमण्डलया मेमेपिं दुजःतय्सं नं ब्वति कयादीगु खः।प्रधानमन्त्री ओलीं थौं हे उद्यमी–बन्जातय्गु ज्याझ्वःयात नं संबोधन याइगु ज्याझ्वः दु।प्रकाश सिलवाल/रासस

Categorized in राष्ट्रिय