थँबहिली च्वंगु विवादास्पद छायादेवी कम्प्लेक्सया सम्बन्धय् सर्वोच्च अदालतं मंसिर २४ गते अन्तिम फैसला न्यंकीगु जूगु दु। सर्वोच्चपाखें थुकिया जानकारी बिउगु खः।

अन्तिम निर्णय न्यंके न्ह्यः थुकी बहस याःपिं फुक्क वकिलतय्त बहस नोट बुझे याये हजि धकाः सुचं नं बीधुंकूगु दु। सर्वोच्चया निर्देशन कथं थुकी बहस याःपिं निगुलिं पक्षं थःथःपिनि बहस नोट सर्वोच्चय् बुझे याये धुंकूगु दु। आः थ्व स्वयाः सर्वोच्चं निर्णय जक न्यंके ल्यं दनिगु खँ धाःगु दु।

थुकी आः तक न्ह्यानाच्वंगु बहसय् सरकार पक्षं वकालत यानाच्वंपिं महान्यायाधिवक्ताया कार्यालय लिसें गुथि संस्थानं नं छायादेवी कम्प्लेक्स सार्वजनिक सम्पत्तिइ दनातःगु छेँ खः धासें थःगु धापू तयेधुंकूगु दु। गुथि संस्थानं नं थ्व थाय् गुथि अन्तर्गत लानाच्वंगु सार्वजनिक जग्गा जूगु कारणं अन कालबिल यानाः मेलमिलाप जुइ फइगु खँ धाःगु दु।

थ्व जग्गा निजी खः धकाः गुथि संस्थानं न्हापा बिउगु लिसः गलत खः धासें उकियात सुधार याये माःगु खँ समेत संस्थानं स्वीकार याःगु दु। गुथिं न्हापा बिउगु लिसः गलत जूगुलिं उकियात संशोधन यायेगु लागिं सर्वोच्चं आदेश बी फइगु खँ नं गुथिं धाःगु दु। थ्व जग्गाय् केयूर शमशेरया नां मोही धकाः उल्लेख यानातःगु दु। लिपा बैंकर पृथ्वीबहादुर पाण्डें थः मां छायादेवी पाण्डेया नामं अन भवन निर्माण याःगु खः।

तर अदालतय् थ्व जग्गाया मोही कथं केयूर शमशेरया नां गय् यानाः वल धकाः नं न्ह्यसः पिहां वःगु दु। मोही जुइगु लागिं केयूर शमशेर कि मखुसा किसान जुइ माल, कि मखुसा गुथियार जुइमाल । छुं हे मखुम्ह मनू मोही जूगु धइगु अनया गुथियारतय्त प्रभावित यानाः नां दुथ्याकूगु प्रमाणित जुइ धासें वयागु मोहियानी हक खारेज जुइमाःगु माग समेत जूगु दु।

Categorized in राष्ट्रिय