चीन भ्रमणय् वनाच्वनादीम्ह नेकपा (एकीकृत समाजवादी) या हनेबहःम्ह नेता नापं पूर्वप्रधानमन्त्री झलनाथ खनाल व जनवादी गणतन्त्र चीनया उपप्रधानमन्त्री दिङ छुएश्याङ थौं नाप लानादीगु दु।

वय्कःपिं बेइजिङया ग्रेट हल अफ द पिपलय् नाप लानादिल। थुगु ज्याझ्वलय् पूर्वप्रधानमन्त्री खनालं आधुनिककरणया प्रक्रियापाखें चीनं याःगु विकास नापं आर्थिक प्रगतियात च्वछानादिल।

चिनियाँ उपप्रधानमन्त्री छुएश्याङं चीन बहुध्रुवीकरण व न्यायपूर्ण नापं समानतापूर्ण हलिं व्यवस्थाया पक्षय् दूगु धासें विश्वशान्ति, शान्तिपूर्ण सहअस्तित्व व विकास नापं समृद्धिपाखे सकारात्मक सुचं न्ह्याकीगु भलसा कयादिल। चाइना इन्स्टिच्युट फर इनोभेसन एण्ड डेभलपमेन्ट स्ट्राटेजी, चाइनिज पिपुल्स इन्स्टिच्युट अफ फारेन अफेयर्स व ग्वाङ्झाउ प्रान्तिय जनसरकारया मंकाः ग्वसालय् ग्वाङ्झाउलय् ग्वसाः ग्वःगु अन्डरस्ट्यान्डिङ चाइना कन्फरेन्सय् ब्वति कायेत वंगु शनिबाः ग्वाङ्झाउ थ्यंकादीम्ह पूर्वप्रधानमन्त्री खनालं चीनया टेलिभिजन नेटवर्क (सिजीटीएन)लिसे अन्तर्वार्ताया झ्वलय् नेपाः–चीन सम्बन्ध, बीआरआई परियोजना व थःम्हेसिनं ब्वति कयागु अन्डरस्टाण्डिङ चाइना कन्फरेन्सया बारे खँ ल्हानादिल।

पूर्वप्रधानमन्त्री खनाल वइगु मङ्सिर २२ गते देय् लिहाँ झाइगु ज्याझ्वः दूगु नेकपा (एकीकृत समाजवादी) या विदेश विभाग सचिव शङ्कर खतिवडां धयादिगु दु।

Categorized in राजनीति