अमेरिकाया ब्याट्सम्यान एन्ड्रिस गौस व दिनेश खरेलया विस्फोटक ब्याटिङया कारणं पोखरा एभेन्जर्सं नेपाल प्रिमियर लिग (एनपीएल) फुटबलय् न्हापांखुसी त्याकूगु दु।

किपूया त्रिवी क्रिकेट मैदानय् शुक्रवाः जूगु कासाय् पोखरां लुम्बिनी लायन्सयात १० विकेटं बुकूगु खः। पोखरां १६.५ ओभरय् छगु हे विकेट गुमेमयासे १७१ रनया च्यालेन्ज पूवंकूगु खः। एन्ड्रिस पोखराया नितिं ऐतिहासिक शतक पूवंकूगु खः ।

वं १२ चौका व ५ छक्काया ग्वाहालिं ५५ बलय् १०४ अविजित रन दयेकूगु खः। आः जुयाच्वंगु एनपीएलय् सुं नं कासामिं छगू हे इनिङय् दकलय् अप्वः रन दयेकूगु थ्व दकलय् अप्वः रन खः। एन्ड्रिस कासाया उत्कृष्ट कासामि जुल। अथे हे दिनेशं खुल्ला मैदानय् नं अविजित ६१ रन दयेकूगु खः। वं ४६ बलय् ४ चौका व ४ छक्का प्रहार याःगु खः। थ्व आन्द्रिस व दिनेशया १७६ या दकलय् अप्वः साझेदारी खः।

टस त्याकाः न्हापां ब्याटिङ याःगु लुम्बिनी निर्धारित २० ओभरय् ५ विकेटया क्षतिइ १७० रन दयेकूगु खः। चुनौतीपूर्ण लक्ष्य तयेधुंकाः बलिङ असफल जूगुलिं लुम्बिनी बुइत बाध्य जूगु खः। लुम्बिनीया निंतिं कप्तान रोहित पौडेलं अविजित ९५ रन दयेकूगु खः। वं ५९ बलय् १० चौका व ४ छक्काया ग्वाहालिं उगु रन दयेकूगु खः।

टम मूर्सं ४५ रन दयेकूगु खः। वं ३८ बलय् २ चौका व २ छक्का प्रहार याःगु ख । सन्दीप जोरां १८ रन थप याःगु खः। पोखराया विपिन खत्रीं बलिङय् निगू विकेट काःगु खः। म्याट क्रिचलीं विकेट काःगु खः। निगूगु कासा म्हितूगु लुम्बिनीया थ्व निक्वःगु पराजय खः। थ्व सिबें न्ह्यः जूगु न्हापांगु कासाय् लुम्बिनी विराटनगर किंग्सलिसे बूगु खः।

स्वंगू कासाय् न्हापांगु कासा त्याकूगु पोखरा थ्वसिबें न्ह्यः चितवन राइनोज व जनकपुर बोल्टलिसे बुइधुंकूगु खः।

Categorized in कासा