राष्ट्रपति रामचन्द्र पौडेल स्वास्थ्यलाभ यानाः डिस्चार्ज जुयादीगु दु। वय्कः वंगु बुधबाः प्रोस्टेटसम्बन्धी उपचार यायेत महाराजगञ्जय् च्वंगु त्रिभुवन विश्वविद्यालय शिक्षण अस्पतालय् भर्ना जुयादीगु खः।

वय्कःया उकुन्हु हे प्रोस्टेटसम्बन्धी शल्यक्रिया जूगु खः। अस्पतालया निमित्त कार्यकारी निर्देशक घनश्याम गुरुङं विज्ञप्ति पिकया राष्ट्रपति पौडेल स्वास्थ्यलाभ यानाः थौं न्हिनय् डिस्चार्ज जूगु धयादीगु खः।

थ्व हे दथुइ, राष्ट्रपति पौडेलं थःगु उपचारय् जुयाजूपिं फुक्क चिकित्सक, स्वास्थ्यकःमि, अस्पतालया मेमेपिं कर्मचारीलिसें स्वदेश व विदेशं थःगु स्वास्थ्य लाभया भिंतुना बियादीपिं सकसितं नं सुभाय् बियादिल।

राष्ट्रपतिया ज्याकुथिं पिकाःगु विज्ञप्तिइ उगु खँ न्ह्यथनातःगु खः।(रासस)

Categorized in राष्ट्रिय