यल दरबार सङ्ग्रहालयलय् न्हूगु प्रदशनी कक्ष थप जुइत्यंगु दु। विश्वसम्पदा धलखय् दुथ्याःगु पाटन दरबार लागाय् च्वंगु सङ्ग्रहालयलय् ऐतिहासिक कलाया संरक्षण व प्रवर्द्धन यायेगु तातुनाः प्रदर्शनी कक्ष थप यायेत्यंगु खः।

आः स्वंगू ऐतिहासिक भवनय् प्रदर्शनी कक्ष दूगु धासें उगु भवनय् परम्परागत कला खनेदइगु न्हूगु प्रदर्शनी कक्ष थप यायेत्यनाःगु दरबार सङ्ग्रहालयया प्रमुख सुरेशमान लाखे न धयादिगु दु । वय्कःया कथं अन्तर्राष्ट्रिय सङ्ग्रहालय दिवस न्ह्यः (आः वइगु जेठ) दुने उलेज्या यायेकथं प्रदर्शनी कक्ष विस्तारया ज्या न्ह्यानाच्वंगु दु।

न्हूगु थप जुइगु प्रदर्शनी कक्षय् कलात्मक मूर्ति निर्माण यायेगु चरण प्रक्रियायात प्रदर्शनीइ तयेगु लाखें जानकारी धयादिल। ल्वहं, सिँ व धातुपाखेंया मूतिकला दयेकिफइगु धासें वय्कलं मूर्ति निर्माणया पलाःपतिकं प्रक्रिया प्रदर्शनय् तयेगु खँ न्ह्यथनादिल। न्हूगु थप जुइगु कक्षय् तयेत यलया लोक चित्रकारं पौभा, ख्वपया इन्द्रकाजी सिल्पकारं काष्ठकला व यल भैँसेपाटीया चन्द्रश्याम डुङ्गोलं ल्वहंया मूर्ति निर्माण यानाः द्वहलपा कथं सङ्ग्रहालययात लःल्हाइगु वय्कलं धयादिल।

संग्रहालयया प्रमुख लाखेया कथं न्हूगु थप जूगु कक्षय् कला उपहार कथं बिउपिं सकसितं उलेज्या ज्याझ्वलय् सम्मान याइगु जूगु दु। संग्रहालयय् कलात्मक मूर्तिलिसें मेमेगु ऐतिहासिक सामग्री तयातयागु धासें पूर्ण ल्वहं व सिँपाखें मूर्ति गथे यानाः दयेकेगु धइगु प्रक्रिया प्रदर्शनीइ मदुगुलिं थःपिंसं क्वथा विस्तार यायेत्यनागु खँ राससयात धयादीगु दु।

न्हूगु कक्षय् थप जुइगु कलात्मक ब्वज्यां परम्परागत कला व संस्कृतिया संरक्षण व प्रवद्र्धन यायेगु नापं आन्तरिक व बाह्य पर्यटकतय्त परम्परागत सीपया अध्ययन यायेगु ह्वःताः चूलाकिगु प्रमुख लाखें धयादीगु दु। वय्कलं धयादी, “संग्रहालयय् छता हे पहःया ऐतिहासिक सामग्री खनाः पर्यटकतय्त म्हाइपुइगु स्वाभाविक खः।

उकिं न्हूगु कलात्मक ज्वलं थपे यानाः संग्रहालयया आकर्षण अप्वयेकेगु व पर्यटन प्रवद्र्धन यायेगु योजना दयेकाःगु दु।”

Categorized in राष्ट्रिय