उपप्रधानमन्त्री नाप अर्थमन्त्री विष्णुप्रसाद पौडेल व अमेरिकी सहायक विदेशमन्त्री डोनाल्ड लु नाप लानादीगु दु।

अर्थ मन्त्रालयकय् थौं जूगु सहलहय् निगू पक्षीय आर्थिक ग्वाहालि, मिलेनियम च्यालेन्ज कर्पोरेसन (एमसिसी) व अमेरिकी अन्तर्राष्ट्रिय विकास नियोग (युएसएआइडी) अन्तर्गतया परियोजना तय्गु प्रभावकारी छ्यलाबुला, विकास वित्त नापं निजी ख्यलय् लगानी परिचालन विषय सहलह जूगु खः।

“नेपाल व अमेरिका दथुइ ग्वहालि कालबिलया विषयकय् सहलह जुल। अमेरिकाया ग्वहालिइ एमसिसी, युएसए आईडिलिसेंया ज्याझ्वःपाखें न्ह्याना च्वंगु परियोजनाया छ्यला बुलाया सम्बन्धय् नं सहलह जुल”, अर्थ मन्त्रालयया सहसचिव धनीराम शर्मां धयादिल, “अमेरिकी अन्तर्राष्ट्रिय विकास वित्त निगम (डिएफसी)पाखें नेपाःया निजी ख्यलय् नं लगानी जुयाच्वंगु व उकियात अझ गथे यानाः प्रभावकारी दयेकेफइ व चकंकाः यंकेफइ नापं नेपालय् थप पुँजी गथे यानाः दुतहयेफइ धइगु बारे वय्कलं चिउताः तयादीगु दु।

थुकिइ जिमिसं निजी ख्यःपाखें लगानीयात प्रोत्साहन यायेत सरकारपाखें ग्वहालि जुइगु प्रतिवद्धता यानागु दु ।” अर्थमन्त्री पौडेलं नेपालय् राजनीतिक स्थायित्व जूगुलिं आःया मू प्राथमिकता आर्थिक समृद्धि जूगु व उकिया निंतिं नेपालय् अमेरिकाया ग्वाहालियात अझ तब्याकेत मन्त्री लुयात इनाप यानादिल अमेरिकी सहायक विदेशमन्त्री लुं दक्षिण एसियाया छुं देय् आर्थिक समस्याय् लाःसां नं नेपालं आर्थिक वृद्धि व स्थायित्व दयेकाच्वनेत ताःलाःगु धासें लय्तानादिल।

वय्कलं अमेरिकां वइगु इलय् नेपाःयात थप आर्थिक ग्वाहालि यायेगु पक्षय् दु धकाः धयादिल।(रासस)

Categorized in राष्ट्रिय