‘नीनिक्वःगु नेपाः मानवअधिकार अन्तर्राष्ट्रिय संकिपा महोत्सव’ य् नेपाःलिसें २३ गू देय्या ५३ गू संकिपा छनोट जूगु दु।

‘सामाजिक न्याय’ लिसें थौं सोमबाःनिसें न्ह्याइगु महोत्सवय् मानव अधिकारया पैरवीया निंतिं थी थी अन्तरक्रिया नापं मुँज्या नं ग्वसाःग्वइगु नेपाल मानवअधिकार अन्तर्राष्ट्रिय संकिपा केन्द्रया नायः नापं महोत्सवया निर्देशक पाण्डव खत्रीं धयादिल। थुगु संस्करणय् अन्तर्राष्ट्रिय ख्यलय् लोकंह्वाःगु संकिपात नं ब्वति काःवःगु दु, मानव अधिकारलिसे स्वापू दूगु संकिपातय्गु प्रवद्र्धन व न्ह्यब्वयेत मद्दिक महोत्सव यानाः वयागु खः”, निर्देशक खत्रीं धयादिल।

राष्ट्रिय मानव अधिकार आयोगया नायः तपबहादुर मगरपाखें उलेज्या जुइगु ज्याझ्वः दूगु महोत्सवय् कान्स व बर्लिनथेंजाःगु हलिंन्यंक लोकंह्वाःगु संकिपा महोत्सवय् सिरपाः त्याकेत ताःलाःगु संकिपात ‘अल वी इमाजिन एज लाइट’, ‘द म्यान हू कुडनट रिमेन्न साइलेन्स’, ‘एन आउटरन’, ‘अनार दाना’ नंं ब्वति काःगुलिं महोत्सव झःझःधाइगु महोत्सव निर्देशक खत्रीं धयादिल।

नेपाःनापं पाकिस्तान, बङ्गलादेश, भारतलिसेंया देय्या प्याखंम्वःतय्सं ब्वति काःगु महोत्सव थनिंनिसें प्यन्हुतक येँया संकिपा विकास बोर्डया सभाहल व नेपाल पर्यटन बोर्डया सभाहलय् क्यनीगु जुइ। सन् २००९ य् नीस्वंगु मानव अधिकार चलचित्र केन्द्रं थुगु महोत्सवया ग्वसाःग्वयाः वयाच्वंगु खः। (रासस)

Categorized in राष्ट्रिय