उपप्रधानमन्त्री नापं अर्थमन्त्री विष्णुप्रसाद पौडेलं मानवअधिकार रक्षाया निंतिं सरकार निष्ठापूर्वक वनाच्वंगु धयादीगु दु।

७६ क्वःगु मानवअधिकार दिवसया झ्वलय् राष्ट्रिय मानव अधिकार आयोगं थौं थन जूगु ज्याझ्वलय् मानवअधिकार आयोगया भूमिकायात अझ प्रभावकारी जुइकेत सरकार जुयाच्वंगु वय्कलं धयादिल। “राज्य व राजनीतिक शक्तित मानवाधिकार रक्षा यायेत प्रतिबद्ध दु।

सर्वोच्च अदालतया फैसला छ्यला बुलाय् हयेत व सङ्क्रमणकालीन न्याययात पीडितमैत्री दयेकेत सरकारं ध्यान ब्यूगु दु। आयोगयात स्वायत्त व सशक्त दयेकेत सरकार तत्पर दु,” उपप्रधानमन्त्री पौडेलं धयादिल। वय्कलं मानवअधिकारया रक्षा व आयोगया ज्या न्ह्याकेत भौतिक नापं आर्थिक स्रोत सुनिश्चित यायेत प्रतिबद्ध जूगु धयादिल।

राष्ट्रिय मानव अधिकार आयोगया नायः तपबहादुर मगरं मानवअधिकार मैत्री जुइ मफूगु कानुन संशोधन यायेमाःगुलिइ बः बियादिल। वय्कलं वैदेशिक रोजगारीइ वना च्वंपिनिगु मानवअधिकार रक्षा संवेदनशील विषय जूगुलिं उखेपाखे स्वापू दूगु फुक्क पक्ष गम्भीर जुइमाःगुलिइ बः बियादिल। थनच्वंगु संयुक्त राष्ट्रसङ्घया आवासीय कजि (युएनडिपी)या आवासीय प्रतिनिधि हाना सिङ्गर–हम्डें कोप २९ य् नेपालं म्हितूगु भूमिका नापं सङ्क्रमणकालीन न्यायया निंतिं याःगु ज्यायात च्वछानादिल।

मानवअधिकार महाभेला २०२४ या कजि भोला भट्टराईं मिसा, श्रमिक, किसान, अल्पसङ्ख्यक तय्गु मानवअधिकारया रक्षाय् बः बियादिल। मानव अधिकार आयोगया दुजः लिली थापां अन्तर्राष्ट्रियस्तरय् नेपाःया मानव अधिकारया अवस्था सन्तोषजनक दूगु धयादिल।

उगु झ्वलय् मानवअधिकार रक्षकया सशक्त भूमिका म्हितादीम्ह वरिष्ठ अधिवक्ता कृष्णप्रसाद भण्डारीयात ‘दयाराम स्मृति सिरपाः’ लःल्हात धाःसा लकस अधिकार रक्षाय् योगदान बियादीम्ह धनुषाया लक्ष्मी महतोयात नं सिरपाः लःल्हात। निगुलिं सिरपाया ध्यबा ५० द्वः खः। (रासस)

Categorized in राष्ट्रिय