यलया ऐतिहासिक कात्ति प्याखं गुरु हरिमान श्रेष्ठ ८८ दँया बैशय् वंगु मन्त । वय्कलं ३ सय ८४ दँ पुलांगु कात्ति प्याखँयात निरन्तरता बीगु नितिं तःधंगु भूमिका म्हितादीगु खः।

वय्कः थः न्हय्दँ दुबलय् निसें कार्तिक प्याखनय् दुथ्यानादीगु खः। वय्कलं निरन्तर ७७ दँ स्वयां अप्वः कार्तिक प्याखनय् थःगु ई फ्यानादीगु दु। वय्कलं २००८ निसें २०७० साल तक थ्यंमथ्यं ६२ दँ तक कार्तिक प्याखँ विरासत ल्यंकेत नेतृत्वदायी भूमिका म्हितादीगु दु। उकथं हे ३२ वर्ष तक निन्हु जक क्यनेगु यानाच्वंगु कात्ति नाच वि.सं २०३८ सालनिसें च्यान्हु तक क्यनेगु ज्या न्ह्याःगुया लिउने वय्कःया हे योगदान खः।

कात्ति प्याखँ थौं स्वयां ३ सय ८४ दँ न्ह्यः यलया जुजु सिद्धनरसिंह मल्लं कृष्ण देगः न्ह्यःने च्वंगु दबुली कार्तिक महिना लछि तक क्यनेगु चलन न्ह्याकूगु खः। कात्ति प्याखनय् दुहां वनेगु झ्वलय् श्रेष्ठं थः न्हय्दँ दुगु इलय् किसली तयाः कात्ति प्याखनय् दुथ्यानादीगु खः। परम्परागत बाजं सय्केत, द्यः गण जुयाः प्याखँ हुइत कीसंली छाय्माःगु परम्परा दु। वय्कलं गुरु हेमबहादुर श्रेष्ठ (बाबुकाजी गुरु) पाखे कात्ति प्याखँ सय्कादीगु खः।

वय्कलं प्याखँ सय्कादीधुंकाः न्हापांखुसि कृष्ण जुयाः प्याखँ हुलादीगु खः। मदुम्ह श्रेष्ठं कृष्ण जुयाः प्याखं ल्हुइधुंकाः निरन्तर खुदँ तक कृष्ण जुयादीगु खः। कात्ति प्याखँ क्यनेगु झ्वलय् दकलय् न्हापां कृष्णया प्याखँ क्यनाः कात्ति प्याखँ न्ह्याइसा कृष्णगणया उपस्थितिइ आरती प्याखँ क्वचाय्धुंका जक कात्ति प्याखं क्वचाय्केगु याइ। वय्कलं खुदँ तक कृष्णगणया भूमिका म्हितादिल। वय्कलं थःगु प्याखँ हुलेगु ज्या क्वचाय्धुंकाः दबली च्वनाः मेपिं कलाकार पिनिगु प्याखँयात दुग्यंक स्वयादीगु खः। गुकिया लिच्वः कथं प्याखँ हुलिपिं कलाकारया अभिनय गुलित तक ग्यसु ग्यंं वा गनथाय् सुधार याय्मा धइगु खँ वय्कःया ज्ञान अप्वया वन।

गुकिं यानाः प्याखँ स्यनेत आपालं ग्वाहालि चूलाःगु खँ वय्कलं थःसतिपिंत कनेगु यानादी। निरन्तर कृष्णया भूमिका म्हिता वयाच्वंम्ह श्रेष्ठयात आकाझाकां बाथःया भूमिका म्हितेमाःगु अवस्था वल। कात्ति प्याखँया न्हापांगु स्वन्हु बाथः प्याखँ क्यनेगु याइ। बाथः प्याखँ न्हापा जुजुया छेँजःपाखे म्हितेगु याना वयाच्वंगु खः। तर बाथःया भूमिका म्हिता वयाच्वंम्ह सानुकाजी २०३८ सालय् मन्त। वयां लिपा जुजु खलःपाखे बाथःया भूमिका म्हितीपिं कलाकारया अभाव जुल । उगु इलय् श्रेष्ठं हे बाथ जुयाः म्हितेत तयार जुयादीगु खः। वयां लिपा बाथः प्याखनय् किजा जुयाः जुजुया छेँजःपिसं म्हितेमाःगु परम्परा नं त्वादल ।

वयां लिपा वय्कलं २०७० साल तक बाथःया किजाया भूमिका म्हितादिल। मदुम्ह श्रेष्ठं थः जक कात्ति प्याखनय् म्हितादीगु मखु वय्कःया काय् विनोदमान श्रेष्ठयात नं प्याखनय् म्हितकाः कात्ति प्याखँया ऐतिहासिकतायात ल्यंकेत योगदान यानादीगु दु। वय्कलं थः जक कात्ति प्याखनय् अभिनय यानादीगु मखु। आपालं ल्याय्म्ह पुस्तायात नं कात्ति प्याखनय् दुथ्याकादीगु दु। वय्कलं थ्यंमथ्यं न्यासः स्वयां अप्वः कलाकारपिंत प्रशिक्षण बियादीधुंकूगु दु। वय्कःपाखे दिक्षित जूपिंसं आः तक नं कात्ति प्याखँयात निरन्तरता बियाच्वंगु दु। वय्कलं कात्ति प्याखँ स्यनादीगु कारणं यानाः वइगु सुइदँ पीदँ तक कलाकारया अभाव जुइ मखु। थुकथं ऐतिहासिक कात्ति प्याखँया गुरु श्रेष्ठयात वय्कः मदयेधुंकूसां नं लुमंकाच्वनी।