थौं भैरहवाय् च्वंगु युनिभर्सल कलेज अफ मेडिकल साइन्सेजय् लुइकूगु प्रेसर कुकर बमयात नेपाली सेनापाखें निष्क्रिय याःगु दु।

मेडिकल कलेजया मालीं सिमा चानाच्वंगु अवस्थाय् सुथसिया थ्यंमथ्यं १०ः३० ताः इलय् पुलांगु प्रेसरकुकर बम लुइकूगु जिल्ला प्रहरी कार्यालय रुपन्देहीया प्रवक्ता प्रहरी नायब उपरीक्षक सुरज कार्कीं धयादिल।

“बम पुलांगु खतंनःगु अवस्थाय् दयाच्वंगु खः, नेपाली सेनां निष्क्रिय याःगु दु”, कार्कीें धयादिल, “सुनाः व गुबले तल थ्व बिषय छुं खुले मजुनि, अनुसन्धान यानाः हे च्वनाःगु दु।”प्रेसर कुकरया ह्याण्डलयात खिपतं चिनाः उकिइ घडी ब्याट्री लगायतया उपकरण जडान यानातःगु खः।

ब्यागय् तयातःगु अवस्थाय् कुकर बम लुइके धुंका मेडिकल कलेजं जिल्ला प्रशासन कार्यालययात खबर याःगु खः। बमयात भैरहवाय् च्वंगु कालीभक्त गणया नेपाली सेनां न्हिनसिया १ ताः इलय् निष्क्रिय याःगु खः। (रासस)

Categorized in राष्ट्रिय