सिद्धार्थ बैंक नेपाल प्रिमियर लिग (एनपिएल)या न्हापांगु संस्करणय् उपाधि जनकपुर बोल्ट्सं त्याकूगु दु। किपूया त्रिभुवन विश्वविद्यालय क्रिकेट ख्यलय् सुदूरपश्चिम रोयल्सयात न्यागू विकेटं बुकाः जनकपुर बोल्ट्सं उपाधि त्याकूगु खः।

सुदूरपश्चिम रोयल्सं त्याकेत ब्यूगु सच्छि व ८५ रनया हाथ्या जनकपुर बोल्ट्सं १९.२ ओभरय् न्यागू विकेट छ्वयाः पूवंकल। जनकपुरयात उपाधि त्याकेत ओपनरपि लाहिरु मिलान्था व आशिफ शेखं न्हापांगु विकेटया निंतिं महत्वपूर्ण ७३ रनया साझेदारी यागु खः।

जनकपुरया निति त्याकेत मिलान्थां आक्रामक अर्धशतकीय पारी म्हितगु खः। ४९ बलय् ४ छक्का व ९ चौकाया ग्वाहालिं ८७ रन दयेकुगु खः। आशिफ शेखं १९ बलय् ४ चौका व २ छक्कालिसें ३३ रनया योगदान बिगु खः। हर्ष थाकरं २४ बलय् २ छक्काया ग्वहालिं ३० रन दयकूगु खः। नापं मोहम्मद मोहसिनं ९ व जिमी निशमं ४, आकाश त्रिपाठीं २ व मयन यादवं २ रन दयेकूगु खः।

सुदूरपश्चिमया निंतिं सैफ अलि जेब, इशान पाण्डे, दीपेन्द्र सिंह ऐरी व स्कट कुग्गेलेइनं बराबर छगू÷छगू विकेट कागु खः।

व स्वयां न्ह्यः टस त्यानाः न्हापां ब्याटिङ याःगु सुदूरपश्चिमं क्वःछिनातःगु २० ओभरय् ९ विकेटय् १८४ रन दयेकूगु खः। उकिया निंतिं ओपनरत सैफ अलि जेब व बिनोद भण्डारीं तसकं बांलाःगु सुरुआत यागु खः। इमिसं न्हापांगु विकेटया निंतिं सच्छि व १७ रनया साझेदारी यागु खः। सैफ अलि जेबं अर्धशतकीय पारी म्हितगु खः। वं ४३ बलय् ८ चौका व २ छक्काया ग्वहालिं ६९ रन दयेकूगु खः।

लिसें बिनोद भण्डारीं ३१ बलय् १ चौका व ३ छक्का थ्वाना ४१ रन दयेकूगु खः। नापं ब्राण्डन म्याक मुलेन व हर्मित सिंहं बराबर १४ रन दयेकल धाःसा स्कट कुग्गेलेइनं १३ रन दयेकगु खः। जनकपुरया निंतिं किशोर महतो व मोहम्मद मोहसिनं स्वंगू÷स्वंगू विकेट कागु खःसा जिमी निशम व ललित राजवंशीं छगू / छगू विकेट कागु खः।

धेंधेंबल्लाया उपाधि त्याकूपिंत ट्रफीलिसें १ करौड १० लख व ल्यू लाःपिंत ५१ लख ध्यबा दइ । लियांल्यू लाःपिंत २५ लख व प्यंगूगु थासय् लाःपिंत १५ लख ध्यबा दइगु नेपाल क्रिकेट सङ्घ (क्यानं) धाःगु खः।

Categorized in कासा