नेपालय् नं थीथी धार्मिक, आध्यात्मिक, सांस्कृतिक लिसें सामाजिक संघ संस्थां विश्व ध्यान दिवस न्यायेकूगु दु।

हिमालय पर्वत मालाया देय् नेपालं योग, ध्यान न्ह्याःगु शास्त्रीय मान्यता दु। योग, ध्यानया आदिगुरु कथं महाद्यःयात कायेगु याः। डिसेम्बर ६, २०२४ य् संयुक्त राष्ट्रसंघया महासभां २१ डिसेम्बरयात विश्व ध्यान दिवस कथं हनेगु घोषणा याःगु खः। विश्व ध्यान दिवसया लसताय् हलिंन्यंकं ३२ घौतक मदिक्क ध्यान ज्याझ्वः न्ह्याकूगु दु।

नेपाल महर्षि वैदिक फाउन्डेसनं नेपालय् थुगु ज्याझ्वः ग्वसाः ग्वःगु खः। नेपाल महर्षि वैदिक फाउन्डेसन लिसें स्वापू दूगु ध्यान केन्द्र, ग्लोबल मदर डिभिजन व देय्न्यंकं न्ह्याना च्वंगु ९० गू गुरुकुलय् शनिबाः मंकाः ध्यानया ज्याझ्वः तयागु फाउन्डेसनया नायः दीपकप्रकाश बाँस्कोटां धयादिल।

अथे हे, जीवन विज्ञान, पतञ्जलि संस्था, ब्रह्मकुमारी राजयोग सेवा केन्द्र, ओशोया नामं न्ह्याःनाच्वंगु थीथी संघ संस्थां थीथी ज्याझ्वःत याना विश्व ध्यान दिवस न्यायेकूगु खः। (रासस)

Categorized in राष्ट्रिय