प्रधानमन्त्री केपी शर्मा ओलीं नेपाल प्रिमियर लिग (एनपिएल) या न्हापांगु ब्वः त्याकूगु पुचः जनकपुर बोल्ट्सया कासामि व व्यवस्थापक तय्त भिंतुना देछाना हंगु दु।

प्रधानमन्त्री निवास बालुवाटारय् थौं जूगु छगू ज्याझ्वलय् प्रधानमन्त्री ओलीं च्वछाय्बहःगु प्रदर्शनलिसें नेपाःया क्रिकेटया स्तर थकायेत भूमिका म्हितूपिं कासामि, नेपाल क्रिकेट संघया पदाधिकारी व व्यवस्थापक तय्त भिंतुना बियादीगु खः।

शनिबाः किपूया त्रिभुवन विश्वविद्यालय क्रिकेट ख्यलय् जूगु बिजं कासाय् जनकपुर बोल्टस्नं सुदूरपश्चिम रोयल्सयात बुकाः उपाधि त्याकूगु खः। प्रधानमन्त्री ओलीं कन्हय्या न्हि अझं तालायेमा धकाः भिंतुना देछासें हलिंमय् लोकंह्वाःपिं कासामिया धलखय् नेपाःमि नं दयेफइ धयाःगु क्यने कथंया आत्मबल, सीप व उत्साह दयेकाः तयेफयेमाः धकाः मनं तुनादिल।

“थ्वः सकल नेपाःमिं त्याःगु खः, नेपाःया क्रिकेटं त्याःगु खः, धेंधेंबल्लापाखें छिकपिनिगु असाधारण क्षमता खने दूगु दु। ल्यू लाःगु सुदूरपश्चिम रोयल्सं नं तसकं बांलाःगु प्रदर्शन यात, तसकं कडा हात्थाया दथुइ नं त्याना वःगुलिं जनकपुर बोल्ट्सया कासामित भिंतुनाया लायक जुयादी”, प्रधानमन्त्री ओलीं धयादिल, “वइगु ई अझं ताःलाक्क म्हितेफयेमाः धकाः सकसितं भिंतुना बियाच्वना।” थः प्रधानमन्त्री जुइ धुंका किपूया क्रिकेट ख्यः तब्याकेगु न्हापांगु निर्णय यानाःगु खँ न्ह्यथःसे वय्कलं थुकिया निंतिं बोलपत्र आव्हान जुइ धुंकूगु धयादिल।

वय्कलं नेपाःया कासा ख्यःया विकासया निंतिं थः व थुगु सरकारपाखें मदिक्क कुतः जुइ धयादिल। थ्वहे झ्वलय् नेपाल क्रिकेट संघ व कासा व्यवस्थापकपिंसं नेपालय् विदेशी कासामि हयेत व कासा ख्यलय् विदेशी लाय् व ग्वाहालि हयेत तसंक थाकूगु खँ तःगु खः। लिसलय् प्रधानमन्त्री ओलीं थुजागु अवस्था वयेके मबीगु व सरकारं माःगु सहजीकरण यानाबियेगु बचं बियादिल। संघया नायः चतुरबहादुर चन्दं सरकारपाखें क्रिकेट कासायात प्राथमिकताय् तःगुलिं सुभाय् देछासें बांलाःपिं विदेशी कासामिया निंतिं श्रम स्वीकृति कायेगु प्रक्रिया झण्झटपूर्ण मदेकेमाल धकाः इनाप यानादिल।

जनकपुर बोल्ट्सया कप्तान आशिफ शेखं थःपिंत प्रधानमन्त्री ओलीं भिंतुनानापं हनादीगुुलिं तसकं लय्तागु दु धका धयादिगु दु।(रासस)

Categorized in कासा