नेपाली कांग्रेसया नेता प्रकाशमान सिंहं पार्टीया व्यवस्थापन हे कांग्रेसया निंतिं मू हाथ्या खः धका धयादीगु दु।

नेपाली कांग्रेसया सच्छिन्हुया विशेष अभियान अन्तर्गत कांग्रेस येँ महानगर समितिं क्षत्रपार्टीइ थौं ग्वसाः ग्वःगु महानगरस्तरीय भेलाय् संबोधन यानादिसें वय्कलं धयादिल, “आः कांग्रेसया निंतिं पार्टीयात व्यवस्थापन यायेफइ कि फइमखु धइगु हे मू न्ह्यसः खः, क्रियाशील दुजःतय्गु ल्याः अप्वः दु।

तर, क्रियाशील दुजः तय्त दुजः जुइगुया महत्व थुइके बिइमाःगु दु।” हरेक क्रियाशील दुजः तय्त पार्टीया ज्याखँय् स्वाका यंकेमाःगुलिइ नेता सिंहं बः बियादिल। देसय् प्रजातन्त्र व प्रजातान्त्रिक मूल्य मान्यता हयेत यक्व सङ्घर्ष याःगु व जनताया हानं–हानं भलसा त्याकूगु कांग्रेस पार्टीया क्रियाशील दुजः जुइगु सामान्य खँ मखूगु वय्कलं धयादिल।

पार्टी दुने समस्या दःसा नापं च्वनाः ज्यंकेगु कुतः यायेमाः वय्कलं धयादिल। येँय् च्वनीपिंसं फया वयाच्वंगु पीर व समस्यात ज्यंकेगुपाखे वनेत नेता सिंहं येँ महानगर समितियात इनाप यानादिल। सच्छिन्हुया विशेष अभियानं पार्टी सङ्गठन सुदृढीकरण यायेत ग्वाहालि जुइगु वय्कलं भलसा कयादिल।

येँ कांग्रेसया सच्छिन्हु विशेष अभियानया निंतिं नेता कृष्णप्रसाद सिटौला सनाजूयादीगु दु। (रासस)

Categorized in अन्तर्राष्ट्रिय