बालेन साहया भ्यु टावरया नक्साय् बदमासी
लहनान्युज | थिंलागा नवमी ११४५, पुस ९ मंगलवाः
येँ महानगरपालिकाया मेयर बालेन साहं प्रमुख प्रशासकीय अधिकृतयात याःगु कारबाहीलय् ट्वीस्ट वःगु दु । वंगु शुक्रवाः येँ महानगरपालिकाया मेयर बालेन साहं प्रमुख प्रशासकीय अधिकृत सरोज गुरागाईंयात येँया पुलांगु बसपार्कय् दयेकाच्वगु भ्यु टावरया नक्सा अनधिकृत रुपं पास याःगु धासें कारबाही याःगु खः ।
प्रमुख प्रशासकीय अधिकृत गुरागाईं माःगु कानुनी प्रक्रिया पूमवंकूसें पुलांगु बसपार्कय् दयेकाच्वंगु भ्यु टावरया नक्सा पासया नितिं स्वीकृत बिउगु धासें छानबिन समिति दयेकूगु खः । गुरागाईं वंगु स्वला न्ह्यः २०८१ असोज ७ गते महानगरया प्रमुख प्रशासकीय अधिकृत कथं पद बहाली याःगु खः । तर नक्सा पासया ज्या धाःसा थ्व स्वयां न्हापा हे जुयाच्वने धुंकूगु लूगु दु । उगु नक्सा पास यायेगु नितिं मेयर साहं हे स्वीकृति बिउगु खँ सीदुगु दु । दछि न्ह्यः हे मेयर साहं न्यागू लाख तक जरिवाना क्वःछिनाः स्वीकृति बिउगु खः । स्वीकृत जूगु पौ कथं मेयर साहं २०८० मंसिर २७ गते निणयया नितिं पेश जूगु खःसा वंगु पुस २ गते स्वीकृत बीधुंकाः सम्बन्धित कम्पनीं पुस ४ गते जरिवाना पूगु खनेदु । पौ कथं मेयर साहं थम्हं हे ५ लाख जरिवाना क्वःछिउगु व निर्माण कम्पनीं नक्सा पासया प्रक्रिया न्ह्यःने न्ह्याकूगु खनेदु ।
प्रमुख प्रशासकीय अधिकृत गुरागाईंयात कारबाही यायेगु झ्वलय् द्वपं बियातःगु दु, ‘येँ महानगरपालिकाया आधिकारिक नक्सा पास प्रणालीइ विभागीय प्रमुखया डेस्कय् दुगु व स्वीकृत मजूगु काठमाडौं भ्युटावर भवनया निर्माणया नक्सा पास भ्वं अनुमति पत्रय् प्रमुख प्रशासकीय अधिकृत सरोज गुरागाईं आधिकारिक प्रणालीपाखे प्रक्रिया पूमवंकूसे नक्सा स्वीकृत याःगु खनेदु ।
थुकी स्पष्ट रुपय् प्रमुख प्रशासकीय अधिकृत गुरागाईं ठेकेदार कम्पनी जलश्वेर स्वच्छन्द बिकोई बिल्डर्स प्रालिलिसे सेटिङय् महानगरया आधिकारिक प्रणालीपाखे प्रक्रिया पूमवंकूसे काठमाडौं भ्यु टावरया नक्सा पास यानाबिउगु खः धइगु स्पष्ट याः । तर दछि न्ह्यः मेयर साहं थम्हं स्वीकृति १९ तल्ला भ्यु टावरय् आः वयाः विवाद पिकाःगु खः धइगु स्पष्ट जुयाच्वंगु दु । दछि न्ह्यः भ्यु टावर दयेकेगु नितिं येँ महानगरपालिकायात कम्पनीं २ करोड ३० लाख तक राजस्व काःगु भ्वं नं आः सार्वजनिक जूगु दु ।
महानगरया सूत्रया कथं २०८० माघ ६ गते महानगरया तत्कालीन प्रमुख प्रशासकीय अधिकृतं उगु निर्माण कम्पनीयात पौ च्वयाः जरिवाना व दस्तु पुलेत निर्देशन बिउगु खः । उगु पौया बोधार्थ मेयर साहयात नं बिउगु खः । सूत्रया कथं तत्कालीन प्रशासकीय अधिकृत वसन्त अधिकारीया पालय् टिप्पणी उठे याःगु खःसा उकियात मेयर साहं सदर यानातःगु दु ।
प्रमुख प्रशासकीय अधिकृतयात कारबाही यायेवं थ्व विवाद चर्चाया विषय जूगु दु । विवाद तच्वया वनेवं येँ महानगरपालिकाया उपमेयर सुनिता डंगोलं थ्व विषययात कयाः निष्पक्ष छानबिन जुइमाःगु खँ धयादीगु दु । वय्कलं यदि थ्व विवादय् सुनां नं षडयन्त्र याःगु खःसा उकियात कयाः नं छानबिन यायेमाःगु खँ धयादीगु दु । वय्कलं थ्व षडयन्त्रय् सु सु दु धइगु बारे निष्पक्ष छानबिन यायेमाःगु माग यानादीगु खः ।
येँ महानगरपालिकाया मेयर साह थीथी निर्वाचित जुइधुंकाः थीथी कथंया विवादय् वनेगु यानाच्वंगु दु । वंगु छुं न्हिं जक मेयर साहं येँ महानगरपालिकाया निर्णय अःखः थीथी वडाया वडा अध्यक्षतय्त गाडी बीवं विवादय् वःगु खः ।
