प्रधानमन्त्री केपी शर्मा ओलीयात नेपाःया निंतिं पाकिस्तानया राजदूत एब्रार एच हस्मीं थौं शिष्टाचार भेट यानादिल।

प्रधानमन्त्री निवास, बालुवाटारय् निगु पक्षीय स्वापू व हितया थीथी विषय, व्यापार, पर्यटन, कृषि, नवीकरणीय ऊर्जा, विपद् व्यवस्थापन, शिक्षा, तजिलजि थेंज्याःगु ख्यलय् जुयावया च्वंगु ग्वाहालि कालबिल यात च्वन्ह्याकाः यंकेगु खँय् सहलह जूगु प्रधानमन्त्रीया निजी सचिवालयंं धाःगु दु।

प्रधानमन्त्री ओलीं दक्षिण एसियाली क्षेत्रीय सहयोग सङ्गठन (सार्क) यात सक्रिय दयेकेत अध्यक्ष मुलुकया नातां थःपिन्सं कुतः याना च्वनाःगु व थुकिइ स्वानाच्वंगु देय् तय्सं नं रचनात्मक भूमिका निर्वाह यायेमाः धयादिल। वय्कलं गुगु नं निगू देय् दथुइ थःथवंया समस्या जुइफुसा नं उकिया प्रतिकूल प्रभाव सार्क थेंज्याःगु क्षेत्रीय सङ्गठनय् लाकेमज्यूगु खँ न्ह्यःथसें नेपाःपाखें सुयानापं शत्रुभाव मतस्यें सार्वभौम व स्वतन्त्र देय्या ल्याखं न्यायोचित राष्ट्रिय हितयात ध्यानय् तयाः सम्बन्ध ब्याकेगु व सहकार्य यायेगु याना वयाच्वनाःगु धका स्पष्ट यानादिल।

राजदूत हस्मीं थःपिं पाकिस्तानय् सार्क शिखर सम्मेलन ग्वसाःग्वयेत तत्पर जुया च्वनाःगु धकाः प्रधानमन्त्री ओलीयात अवगत याकादिल। वय्कलं थःपिं आः वइगु दिनय् नेपाः नाप थीथी विषय थप सहकार्य यायेत इच्छुक जुयाच् वनाःगु धकाः नं धयादिल।

Categorized in राष्ट्रिय