संयुक्तराज्य अमेरिकाया थीथी सहरय् नेपाःया कला व तजिलजि प्रवद्र्धन यायेगु तातुनां साङ्गीतिक व हास्य व्यङ्ग्य ज्याझ्वः जुइत्यंगु दु।‘अब नाच्छ अमेरिका २’, ‘अब हाँस्छ अमेरिका २’ व ‘अब सुन्छ अमेरिका’ शीर्षकय् स्वंगू ब्यागलं ज्याझ्वः न्ह्याइगु ग्वसाः खलः ‘फ्लाइ नेपाः’ या नायः विनोद अधिकारीं धयादिगु दु। वय्कलं धयादिल, “जिमिसं न्ह्यइपूगु ज्याझ्वःत दयेकाःगु दु।

थुकी न्हिलेगु, प्याखँ हुलेगु व न्यनेगु यानाः स्वंगू हे विधायात कःघानागु दु। जिमिसं थुकियात अझ यक्वः सभ्य व भव्य कथं न्ह्याकेगु तयारी यानाच्वनाःगु दु। अमेरिकाया थीथी सहरय् वइगु फेब्रुअरी व अप्रिलय् ज्याझ्वः यायेत्यनाःगु दु।” नायः अधिकारीं ‘अब नाच्छ अमेरिका २’ खय् म्ये हालामि बद्री पंगेनी व प्रताप दास, कला लम्साल व एलिना चौहान, ‘अब सुन्छ अमेरिका’ खय् कवि प्रदीप रोदन व साइग्रेस पोखरेल व ‘अब हाँस्छ अमेरिका २’ खय् मिस पवि, पवन खतिवडा, सुनीता श्रेष्ठलिसेंया न्ह्यब्वइगु जुगु दु।म्येहालामि प्रताप दासं थःनापनापं फुक्कं कलाकारं ज्याझ्वःया तयारी यानाच्वंगु दु धयादिल ।

वय्कलं धयादिल, “जिमिसं अमेरिकाया परिवेश नापं ज्वःलाःगु ज्याझ्वः दयेकाः तयारी यानाच्वनाःगु दु। थुगुसिइ जिपिं नापनापं स्वकुमि तय्त नं प्याखँ ल्हुकेगु जुइ। थ्व सांङ्गीतिक यात्रा तसकं न्ह्यइपुसे च्वंगु व लुमंकेबहःगु जुइ धयागु भलसा दु।” ग्वसाः खलःया कथं अमेरिकाया न्युयोर्क, वासिङ्टन डिसी, ओहायो, कोलोराडो, बोस्टन, पेन्सेल्भेनिया, सिकागो, क्यालिफोर्नियालिसेंया सहरय् ज्याझ्वः जुइ।

थ्वस्वया न्ह्यः फ्लाइ नेपालं ‘अब नाच्छ अमेरिका’ व ‘अब हाँस्छ अमेरिका’ ज्याझ्वः क्वचायेके धुंकूगु दु।

Categorized in मनोरन्जन