स्थानीयतय्त कम भावं जग्गा मिइका छगू हाउजिङ व्यवसायीयात फाइदा याकूगु द्धपनय् अख्तियार दुरुपयोग अनुसन्धान आयोगं नागार्जुन नगरपालिकाया प्रमुख मोहनबहादुर बस्नेत विरुद्ध भ्रष्टाचार मुद्दा दायर याःगु दु।

बस्नेतयात अख्तियारं ९ करोड २२ लाख ध्यवा घुस काःगु द्धपः दु। अख्तियारं बस्नेतयात पद्मा मर्चेन्ट कम्पनी प्रालि व वया सञ्चालक राजुप्रसाद कँडेलयात फाइदा जुइगु कथं ज्या याःगु द्धपः दु। अख्तियारया कथं ४७ करोड ७५ लाख रुपैयाँ तुइगु जग्गा पद्मा कोलोनीयात १८ करोड ९४ लाखं उपलब्ध याकूगु खः।

उकि बापत राजु कँडेल व वयागु कम्पनीयात साढे २५ करोड रुपैयाँ फाइदा जुगु अख्तियारं द्धपं ब्यूगु दु। उगु पाखे हाउजिङ कम्पनीयात फाइदा याःगु बापत मोहन बस्नेतं थःगु बैंक खाताय् २ करोड १५ लाख तका घुस काःगु  अख्तियारया द्धपः दु। अख्तियारं मोहन बस्नेतया जहान उर्मिलाया खाताय् ६ करोड ८२ लाख तका जम्मा याःगु दाबी दु।

अथेहे, शंकर होटलय् मोहन बस्नेतं याःगु पार्टीया ध्यवा तक राजु कँडेलं पुलां ब्यूगु अख्तियारया आरोपत्रय् उल्लेख याःगु दु। पार्टी यागुलि करिब २५ लाख तका पुला ब्यूगु खः। अख्तियारं मोहन बस्नेत व वया जहानपाखे ९ करोड २२ लाख तका घुस नःगु द्धपनय् भ्रष्टाचार मुद्दा दायर याःगु खः।

Categorized in राष्ट्रिय