सोमवाः चान्हय् १२ ता ईनिसें प्रहरी अतिरिक्त महानिरीक्षक (एआईजी) किरण बज्राचार्य अनिवार्य अवकाशय् वनीगु जूगु दु।

प्रहरी नियमावली २०७१ कथं ५६ दँ उमेर हदया हुनिं बज्राचार्य थौं सोमवाः चान्हय् निसें अवकाशय् वनीगु जूगु दु।काठमाडौं उपत्यका प्रहरी ज्याकुथि लानीपुखुली ज्या यानाच्वंम्ह एआईजी किरण बज्राचार्य अवकाशय् वनीगु जुइखतं नेपाल प्रहरीइ खालि जूगु एआईजीया ल्याः निम्ह थ्यंगु दु।

थ्व स्वया न्ह्यः  ११ पुसय् मेम्ह एआईजी भरतबहादुर बोहरा अनिवार्य अवकाशय् वंगु खः। बोहरा ४ पुसय् जक एआईजी पदय् बढुवा जूम्ह खः। बोहरा व बज्राचार्य अवकाशय् वनेखतं खालि जूगु निम्ह एआईजीया दरबन्दीया नितिं डीआईजीपिं दथुइ धेंधेंबल्ला जुइगु जूगु दु।

एआईजी बढुवाया नितिं डी आईजी कुवेर कडायत, चन्द्र कुवेर खापुङ, रवीन्द्र केसी, जनक भट्टराई बढुवाया दाबेदार जूगु दु।विद्यमान प्रहरी नियमावली कथं बढुवा दाबेदारपिं मध्ये कडायत, केसी, भट्टराई वइगु चैत्र ५ गते प्रहरी महानिरीक्षक बसन्तबहादुर कुँवरलिसें ३० दँया सेवा अवधिया हुनिं अनिवार्य अवकाशय् वनीगु जूगु दु ।खापुङ धाःसा २०८२ कार्तिकय् अवकाश जुइगु जूगु दु।

Categorized in राष्ट्रिय