कारोबार नेपाल स्टक एक्सचेञ्ज (नेप्से) परिसूचकय् लिपांगू स्वला लिपा दकलय् म्ह्वः कारोबार जुगु दु।

थौं नेप्से परिसूचक ५.१० ल्याखं अप्वयाः २५०० सय व ८१.६० या ल्याखय् थ्यंबलय् कारोबार ध्यबा ३ अर्ब त्याया लिक्क कयेकुंगु खः। थौं स्वसः व गुगू कम्पनी तय्गु ९४ लख ३४ द्वः व ९ कित्ता शेयर ४३ द्वः ७ सः व २९ क्वः न्यायेगु मिइगु जूबलय् ३ अर्ब ५९ क्वति ७४ लख ४५ द्वः ३ सः ३४ बराबरया कारोबार जूगु नेप्सें धाःगु दु।

थ्व कारोबार ध्यबा वंगु असोजया लिपांगु वालिपाया हे म्ह्वः जुगु खः। मगलवाःया कारोबारय् यक्व पाः जूगु वित्त पुचः थौं भतिचा धिसिलानाः उच्च वृद्धि खनेदुगु खः। वित्त पुचः ३.८७, विकास बैंक १.६८ व जलविद्युत् पुचः १.२४ प्रतिशतं अप्वःगु दु। अथेहे, होटल व पर्यटन ०.९५, लगानी ०.०९, उत्पादन व प्रशोधन ०.२५, निर्जीवन बिमा ०.२२ व बनेज्या पुचः ०.६३ प्रतिशतं अप्वःगु दु।

मेमेगु पुचः तय्गु उपसूचकय् धाःसा पाः जूगु खनेदु। बैंकिङ ०.७२, जीवन बिमा ०.०६, लघुवित्त ०.१६, म्युचुअल फन्ड ०.१७ व मेमेगु पुचः ०.४१ प्रतिशतं पाः जूगु खनेदु। त्रिशूली जलविद्युत् कम्पनी लिमिटेडया शेयर मू सकारात्मक सर्किटय् वंगुलय् सर्पोट माइक्रोफाइनान्स वित्तीय संस्था लिमिटेडया शेयरया मू धाःसा नकारात्मक सर्किटय् वंगु दु।

कारोबार ध्यबाया आधारय् थौं दकसिबे अप्वः एनआरएन इन्फ्रास्ट्रक्चर एन्ड डेभलपमेन्ट लिमिटेडया २१ क्वति ८२ लख १७ द्वः ३ सः व ४९ बराबरया शेयर न्यायेगु मिइगु जूगु दु । कारोबार जूगु शेयर ल्याया आधारय् सन्राइज ब्लुचिप फण्डया १७ लख ३४ द्वः ५ सः व ८९ कित्ता शेयर न्यायेगु मिइगु जूगु दु।

Categorized in राष्ट्रिय