नेपाल प्रहरीइ न्याम्ह वरिष्ठ उपरीक्षक (एसएसपी)पि सरुवा जूगु दु। मंगलवाः बहनि गृहमन्त्रीस्तरीय निर्णयपाखे न्याम्ह एसएसपीपि सरुवा याःगु खः।

सरुवा जूपि सुदूरपश्चिम प्रदेश प्रहरीइ ज्या यानाच्वम्ह एसएसपी श्यामकृष्ण अधिकारी जिल्ला प्रहरी परिसर यलया प्रमुखय् सरुवा याःगु दु।

यलय् ज्या यानाच्वम्ह एसएसपी शेखर खनालयात काठमाडौं उपत्यका प्रहरी कार्यालय लानिपूखुलि सरुवा याःगु दु। लानिपूखुलि ज्या याना च्वम्ह एसएसपी विनोद घिमिरेयात काठमाडौं उपत्यका ट्राफिक प्रहरी कार्यालय रामशाह पथय् सरुवा याःगु दु।

राष्ट्रिय सुरक्षा परिषदया सचिवालय सिंहदरबारय् ज्या यानाच्वम्ह एसएसपी सोमेन्द्र सिंह राठौरयात त्रिभुवन अन्तर्राष्ट्रिय विमानस्थल सुरक्षा कार्यालय गौचरय् सरुवा याःगु दु।

Categorized in राष्ट्रिय