स्वंगः चिभाः मिसा पुचलं उद्घोषण तालिम बिल
सुरज, लहनान्यूज | पोहेलाथ्व पञ्चमी ११४५, पुस २० बिहीवाः
यल ख्वायबहिलया स्वंगः चिभाः मिसा पुचलं १२ न्हुया ब्यक्तित्व विकास व उद्घोषण तालिम ब्यूगु दु । ललितपुर महानगरपालिका २० वडाया ग्वाहालिइ न्ह्याःगु थुगु तालिमय् मिसा पुचः व मचा पुचः यानाः २५ म्हसिन ब्वति कयादीगु खः । तालिम सुरजवीर बज्राचार्यं बियादीगु खः ।
पुचःया नायः शान्ति महर्जनया नायःसुइ जूगु समापन ज्याझ्वलय् मूपाहां वडा २० या महिला सदस्य गीता महर्जनं ब्यक्तित्व विकासया तालिम व अभ्यास निरन्तर जुइमाःगु धयादिसें एडभान्स तालिमया नितिं नं वडाया ग्वाहालि दइगु प्रतिवद्धता प्वंकादिलसा वडाय् दुगु श्रोतया उपयोग यायेत नं वडाया खलःपुचः न्ह्यज्यायेमाःगु खँ न्ह्यथनादिल । वडापाखें जुइफुगु ग्वाहालि कयाः सक्रिय जुयाः ज्याझ्वः न्ह्याकेत वयकलं इनाप यानादीगु खः । स्वंगः चीभाः युथ क्लब व स्तम्भ सहकारीया नायः धनबहादुर महर्जनं तालिमपाखें सयेकादीपिं सशक्त जूगुलिइ लसता प्वंकादिल । प्रशिक्षक बज्राचार्यं समापन समारोह वास्तवय् उद्घाटन जूगु धयादिसें थनंलिं थःम्हं सयेकातगु गुण उपयोग यायेगु ज्या न्ह्याकेमाःगु खँ तयादिल । माःबलय् माःकथं ग्वाहालि यायेत थः सदां प्रतिवद्ध जूगु खँ न्ह्यथनादीम्ह वयकलं सकसिनं यानादीगु मेहेनतया नितिं सुभाय् नं बियादिल ।
पुचःया सह–कोषाध्यक्ष लक्ष्मी शाक्यं लसकुस यानादीगु थुगु ज्याझ्वलय् सुभाय् निवर्तमान नायः विनिता शाक्यं देछानादीगु खः ।
ज्याझ्वलय् मूपाहां महर्जनं तालिमय् ब्वति कयादीपिं सकसित दसिपौ लःल्हानादिल । ग्वसाः खलःपाखें प्रशिक्षण सुरजवीर बज्राचार्ययात हनापौ देछाःसें सम्मान याःगु खःसा मूपाहां, पाहांपिन्त नं मतिनाया चिं लःल्हाःगु खः ।
प्रशिक्षार्थीपिं आस्था शाक्य, मन्दिरा शाक्य, मन्दिरा महर्जन, आयोग्या शाक्यं थःगु नुगःखँ तयादीगु खःसा ज्याझ्वः आभा राजोपाध्याय व श्रेशा श्रेष्ठं न्ह्याकादीगु खः ।
