गणतन्त्र कोरियाया कार्यवाहक राष्ट्रपति चोइ साङ मोकया न्ह्यःने नेपाःया राजदूत डा शिवमाया तुम्बाहाम्फें थःगु ओहदाया दसिपौ न्ह्यब्वःगु दु।

मङ्गलबाः सियोलय् छगू समारोहया दथुइ वय्कलं थःगु ओहदाया दसिपौ न्ह्यब्वःगु खः। दसिपौ न्ह्यब्वय् धुंका राजदूत तुम्बाहाम्फें कार्यवाहक राष्ट्रपति चोईनाप नापलानादीगु सिओलय् च्वंगु नेपाःया राजदूतावासपाखें थौं धाःगु दु।

उगु अवसरय् वय्कलं नेपाः व कोरियादथुइ कूटनीतिक सम्बन्ध निस्वंगु ५० दँ थ्यंगु सन्दर्भय् निगू पक्षीय स्वापूयात अप्वः च्वन्ह्याकेत उच्चस्तरीय भ्रमण कालबिल महत्वपूर्ण जुइगु धासें आः वइगु मे तक उज्याःगु भ्रमणया निंतिं सहजीकरण यायेत दूतावासयात ह्वःताः दइगु विश्वास प्वंकादिल।

थःगु कार्यकालय् निगू देय्दथुइया स्वापूयात धिसिलाकेत इमान्दार जुयाः ज्या यायेगु प्रतिबद्धता प्वकुंसे राजदूत तुम्बाहाम्फें गणतन्त्र कोरियाय् च्वंपिं छगू लख स्वयाः अप्वः नेपाःया कामदारतय्सं निगू देय्दथुइ जनस्तरया स्वापूयात प्रवद्र्धनया नापं कोरियाया अर्थतन्त्रय् योगदान याःगु धयादिल।

कार्यवाहक राष्ट्रपतिं राजदूत तुम्बाहाम्फेयात गणतन्त्र कोरियाया निंतिं नेपाःया राजदूतया कथं लसकुस यासें नेपाः व कोरियाया स्वापू बल्लाकेत फक्वः ग्वाहालि यायेगु धयादिल।

Categorized in राष्ट्रिय