मातृभाषा संरक्षण यायेगु निति पत्रकारिताया भूमिकायात प्रभावकारी दयकेमाःगुलि दक्षिण एसियाया पत्रकार तयेगु दथुइ थः व थः सहकार्य व छप्प छधिइ जुइमाःगुलि बः बिइगु दु।

अम्रपाली कला साहित्य सम्मेलन बैशालीं सार्क जर्नलिष्ट फोरम भारत च्याप्टर, वैशालीनाप मिले जूया बासोकुण्ड महावीर जन्मभूमीया सभाहलय् जुगु छगु ज्याझ्वलय् मातृभाषा संरक्षण यायेगु निति पत्रकारिताया भूमिकापाखे प्रभावकारी यायेमाःगुलि बःबिउगु खः। उगु ज्याझ्वलय् अन्तर्राष्ट्रिय लोक संस्कृतिया विज्ञ डा. सरिता बधुं मातृभाषा  संरक्षण यायेगु निति राज्य व जनताया तधःगु भूमिका जुइ धका धयादीगु खः। वयकलं बैशालीइ प्रचलित बज्जिका भाषा इतिहास व उकिइ निर्माण यान तःगु सभ्यताय् उल्लेख यानादीसे बज्जिकानाप भोजपुरी भाषायात च्यागुगु भाषाया धलखय् तयेमाःगुलि बः बियादीगु खः। बैशालीयाखे उत्पति जूगु बज्जिका भाषा नेपाःया पूर्वी तराई मधेशय् न्यागु जिल्लाय् ल्हानाच्वंगु दु।

उगु ज्याझ्वः उच्च न्यायालय पटनाया पूर्व न्यायाधीश राजेन्द्रप्रसादं बैशाली भाषा, संस्कृति व धार्मिक हिसाबं ऐतिहासिक भारत वर्षया महत्वपूर्ण थाय् दुगुलि उगु सभ्यता ल्यकातयेगु निति भाषा व लोकसंस्कृतिया संरक्षण यायेमाःगुलि बःबियादीगु खः। सार्क जर्नलिष्ट फोरम बैशालीया अध्यक्ष डा.शशि भूषण कुमारं मातृभाषा संस्कृति व सभ्यताया संवाहक जुगुलिे पत्रकार तयेस मातृभाषा संरक्षण यायेगु ज्या न यायेमाः धका धयादीगु खः। बैशालीपाखे प्रकाशित जुइगु मानवअधिकार टुडेया सम्पादक न जुयादीम्ह डा.कुमारं मातृभाषाया संरक्षण यायेगु निति न पत्रकारिता तयेगु भूमिकापाखे प्रभावकारी ज्या जुइमागुलि बः बियादीगु खः। उकिइ सार्क क्षेत्रया पत्रकार तयेगु सहकार्य जुयाच्वनेमाः धका धयादीगु खः।

ज्याझ्वलय् नेवाः पत्रकार राष्ट्रिय दबूया केन्द्रीय अध्यक्ष नृपेन्द्रलाल श्रेष्ठं नेपालय् मातृभाषा शताब्दी दँ हना च्वंगु इलय् भारतया बैशालीइ न अन्तर्राष्ट्रिय मातृभाषा सम्मेलन याउगुलि गौरवया विषय जुगु दु धका धयादीगु खः।नेपालय् न्हापांगु पटक अन्तर्राष्ट्रिय मातृभाषा पत्रकारिता सम्मेलन याना भाषा बचे यायेगु निति पत्रकारिता पाखे सम्मलेन याना न्ह्याकागु ज्या थौ भारतया बैशाली बज्जिका भाषायात ध्यानय् तया यायेगु ज्या तसकं च्वछाय् बहःजु ज्या जुगु दु धका धयादीसे सार्क जनलिष्ट फोरमं नेपालय् न्ह्यागु मातृभाषा पत्रकारिता सम्मलेन थौ भारतय् जुगु दु। आः मेमेगु देशय् न जुइ भलसा कयादीगु खः।

ज्याझ्वलय् डा. जितेन्द्रकुमार सिंह न मातृभाषाय् न्हि न्हि भाषा ल्ह्यायेगु व न्ववायेगुलि न भाषाय् जीवन्त शक्ति वइ धका धयादीगु खः। वयकलं मातृभाषापाखे सम्प्रेषणीय क्षमता, व नाप स्वाना च्वंगु संस्कृति, संस्कार व सभ्यतायात म्वाका तयेगु निति न महत्वपूर्ण जुइ धका धयादीगु खः।

नेपालय् दक्कोय् मातृभाषायात राष्ट्रभाषाया थाय् बियातःगु दु धका धयादीसे नेवाः पत्रकार राष्ट्रिय दबूया वरिष्ठ उपाध्यक्ष सुनील महर्जनं थुकिइ मातृभाषा विकास यायेगुलि अझ भलसा कायेगु थाय् दु धका धयादीगु खः। वरिष्ठ उपाध्यक्ष महर्जनं मातृभाषा पत्रकारितापाखे सूचना बिइगु, शिक्षा बिइगु नापं भाषा म्वाकेगु निति महत्वपूर्ण भूमिका निर्वाह याइगुलि मातृभाषाया पत्रकारितापाखे दक्को पक्षनाप सहकार्य जुइमाः धका धयादीगु खः। मातृभाषाया पत्रकारिता विकास यायेगु निति सार्क जर्नलिष्ट फोरमया न तधःगु महत्वपूर्ण दया वयाच्वंगु दु धका धयादीगु खः।

विहार हिन्दी साहित्य सम्मेलनया अध्यक्ष डा अनिल सुलभ,कौसर प्रवेज खान लगायतपिन्स थःथःगु खँ तयादीगु खः सा डा. शशिभूषण कुमार व अमितकुमार विश्वासं च्वयादीगु मानव अधिकार एक दृष्टि नांया सफू न लोकार्पण जूगु खः।

उगु ज्याझ्वलय् नेवाः पत्रकार राष्ट्रिय दबूया नायः नृपेन्द्रलाल श्रेष्ठयात मातृभाष पत्रकारिता ख्यलय् योगदान यानाच्वंगुलि मातृभाषा अन्तराष्ट्रिय अवार्ड लःल्हागु खःसा दबूया बरिष्ठ उपाध्यक्ष सुनिल महर्जन व उपाध्यक्ष सुरेन्द्रभक्त्त श्रेष्ठयात न सम्मान याःगु खः। 

Categorized in राष्ट्रिय