येँ महानगरपालिकाया मेयर बालेन साहं जनताया करयात दुरुपयोग यानाच्वंगु दु। मेयर साहं येँ महानगरपालिकायाया ज्याकू दुगु काठमाडौं प्लाजाय् थःगु नितिं जक बिस्कं लिफ्ट जडान यानातःगु दु।

सूत्रया कथं मेयर साहया फिङर प्रिन्ट जक चले जुइगु कथं लिफ्टय् सफ्ट वेयर तयातःगु दु। गुकिया कारणं उगु लिफ्टं सुनं वनेत स्वल धाःसा वने फइगु अवस्था मदुगु खँ धाःगु दु। उकथं हे मेयर साहया कार्यकक्ष नं दँय् दसं हे मर्मत यायेगु नामय् लाखौं तक ध्यबा खर्च यानाच्वंगु दु। उकथं हे थीथी थासय् सिसी क्यामेरा तयेगु नामय् नं करोडौं तक खर्च यानाच्वंगु खँ सूत्रं धाःगु दु। सूत्रया कथं काठमाडौं प्लाजाया फुक्कं धयागु थासय् अडियो सहित सिसी क्यामेरा तयातःगु दु। अज्याःगु सिसी क्यामेराया फुटेज स्वयेगुया लिसे उकिया अडियो तकं मेयर साहं न्यने फइगु कथं व्यवस्था यानातःगु दु।

मेयर साहं थःगु कार्यकालय् १ हजार १ सय सिसी क्यामेरा जडान यायेगु आज्जु तयातःगु दु। उकिया नितिं जक ४० करोड तका खर्च जुइगु खँ येँ महानगरपालिका सूत्रं धाःगु दु। उकिया नितिं दँय् दसं १० करोडया बजेटया व्यवस्था यानाच्वंगु दु । मेयर साहं थःगु प्रचार प्रसार याकेगु नितिं जक १ करोड तक खर्च यानाः ‘क्यानाडा नेपाल’ नांया अनलाइगु युट्ब च्यानल न्याःगु दु। उगु च्यानलं मेयर साहंया चर्चा यायेगु ज्या यानाच्वंगु दु।

उगु च्यानलं मेयर साहं गन वन। छु न्ववात धइगु फुक्कं धयाथें गतिविधि कभर यानाः युट्युबलय् तयेगु यानाच्वंगु दु। येँ महानगरपालिकाया थःगु हे एफएम दयेक दयेकं थुकथं अनलाइन युट्युब न्यायेगु नं छगू कथंया भ्रष्टाचार जूगु खँ स्वय्म अनया हे कर्मचारीतय्सं धायेगु यानाच्वंगु दु। नेपाल सरकारं नेपाल टिभी व गोरखापत्रयात हे आधिकारिक मान्यता बियातःगु दु। तर येँ महानगरपालिकां हाम्रो काठमाडौं, मेट्रो न्युजयात धाःसा विश्वास यानाच्वंगु मदु। येँ महानगरया कर्मचारीतय् कथं मेयर साहं याःगु ज्याया प्रचार यायेगु खःसा येँ महानगरपालिकाया स्वामित्वय् दुगु सञ्चार माध्यम छ्यले माःगु खः।

तर थःगु स्वामित्वय् दुगु सञ्चार माध्यमं थःगु गुणगान म्हो याइगु जूगुलिं मेयर साहं अनलाइन युट्युब ध्यबा बियाः यकःति प्रचार याकाच्वंगु खः। थ्वहे झ्वलय् येँ महानगरपालिकाया प्रशासनिक ज्या भद्रगोल जुयाच्वंगु खँ सीदुगु दु। मेयर साहं प्रमुख प्रशासकीय अधिकृत सरोज गुरागाईंयात निलम्बन याःगु खः। वयां लिपा प्रमुख प्रशासकीय अधिकृतया जिम्मेवारी येँ महानगपालिकाया शिक्षा विभाग प्रमुख गोविन्द शर्मायात बिउगु खः। तर कार्यवाहक प्रमुख प्रशासकीय अधिकृत जुयाच्वंम्ह शर्मा आकाझाकां राजीनामा बीवं आः कार्यवाहक सुयात बीगु धइगु अन्यौल जुयाच्वंगु दु।

मेखे मेयर साह छुं न्हिं न्ह्यवंनिसें येँ महानगरपालिकाया सम्पर्कय् मदुगु खँ सीदुगु दु । शर्मा छुं न्हिं न्ह्यः जक कार्यवाहक प्रशासकीय अधिकृत जूगु खःसा वय्कःया अवकाश जुइगु ई झिंन्याला ल्यँ दनि । थःगु कार्यकाल ल्यँ दयेकाः राजीनामा बीगु कारणं थीथी कथंया आशंका यानाहःगु दु। विशेष यानाः येँ महानगरपालिका २८ वडाय् दयेकाच्वंगु १२ तल्लाया भ्यु टावरयात कयाः मेयर साहं प्रमुख प्रशासकीय अधिकृत गुरागाईंयात निलम्बन याःगु खः । उगु भ्यु टावर न्हापां १२ तल्लाया जक दयेकेगु सम्झौता जूगु खः। वयां लिपा १९ तल्ला दयेकेगु कथं मेयर साहं हे स्वीकृत बियातःगु खः।

थःगु गलत ज्याया त्वःपुइत जक मेयर साहं गुरागाईंयात कारबाही याःगु धकाः हुइना भुइना जुयाच्वंगु इलय् कार्यवाहक प्रशासकीय अधिकृत नं राजीनामा बीवं थीथी कथंया आशंका ब्वलंका बिउगु दु।

Categorized in राष्ट्रिय