प्रधानमन्त्री केपी शर्मा ओलीं रोजगारी व निर्यात वृद्धिइ योगदान बिइगु हस्तकला ख्यलय् सरकारया न्ह्याबलें प्राथमिकता दइ धकाः धयादीगु दु।

नेपाल हस्तकला महासङ्घया ४४ क्वःगु वार्षिक साधारणसभाया उलेज्या समारोहयात संबोधन यानादिसें प्रधानमन्त्री ओलीं मुलुकय् रोजगारी, उत्पादन, उद्यमशीलता, आत्मविश्वास व निर्यात अप्वकेगु ख्यः जुगुलिं थुकिया निंतिं सरकारं यायेमाःगु ज्याया निंतिं थःपिंसं फक्व कुतः यायेगु भलसा बियादिल।

प्रधानमन्त्री ओलीं कला व तजिलजिइ नेपाः तःमि जुगुलिं हस्तकला ख्यः गबलें तनीमखु धयादिसें बजाःया सामान स्वयां थःम्हेसिनं हे मेहनत यानाः दयेकूगु खाना व सामान अप्वः छ्यलेत इनाप यानादिल। “झीगु देय् कलाया निंतिं नांजाः । थनया कला अमूल्य जू । थुकिइ झीगु दृष्टिकोण व कला दुथ्यानाच्वनी”, प्रधानमन्त्री ओलीं धयादिल, “हस्तकलां मिसातय्त रोजगारी व सीप विकासया नापनापं सामाजिक उत्थानय् नं ग्वाहालि यानाच्वंगु दु।

थुगु ख्यलं उत्पादित सामान निर्यात यायेगु कुतः याये, जिं थुकिया थी थी विधाया विकास यायेत छु यायेमाः धइगु बारे महासङ्घयात सःताः सहलह याये। उकिया लिधंसाय् झीसं मेगु ज्या यायेगु जुइ।” महासङ्घया नायः प्रचण्ड शाक्यं सरकारं सार्वजनिक निकायतय्के स्वदेशी सामान छ्यलेगु अनिवार्य यायेगु सम्बन्धी निर्देशिका पिथंगुलिं लसकुस यानादिसें उकियात प्रभावकारीकथं छ्यला बुलाय् हयेमाःगुलिइ बः बियादिल।

वय्कलं निर्यात वृद्धि व सहजीकरणया निंतिं थी थी बुँदाय् प्रधानमन्त्री ओलीया ध्यानाकर्षण यानादिल। हस्तकला ख्यलं प्रत्यक्ष व अप्रत्यक्ष कथं ११ लख रोजगारी सृजना याःगु दु धाःसा थुकिं थ्यं मथ्यं ११ अर्ब बराबरया सामान निकासी जुयाच्वंगु धयातःगु दु। ज्याझ्वलय् च्वन्ह्याःम्ह निर्यातकर्ता व योगदानकर्तायात सम्मान नं याःगु खः।

Categorized in राष्ट्रिय