टोखाय् चाकुस्तम्भ निर्माण टोखाय् घ्यः चाकु संल्हुं नखःया झ्वलय् ‘चाकु दिवस’ न्यायेकेत्यंगु दु।

नेपाः युवा क्लब टोखाया ग्वसालय् नापं टोखा परम्परागत चाकु संरक्षण समाजया मंकाः ज्याय् घ्यः चाकु संल्हुं नखःया झ्वलय् वइगु माघ १ गते टोखा बजारय् ‘चाकु दिवस’ न्यायेकेत्यंगु खः।

टोखा परम्परागत चाकु संरक्षण समाजया नायः कृष्ण श्रेष्ठं टोखाय् दुने उत्पादन जुगु चाकु व थुकिं दयेकातःगु नँसा त्वँसायात चाकु दिवसया झ्वलय् न्ह्यब्वयेगु खँ कनादिल। टोखाय् घ्यः चाकु संल्हुं नखःया झ्वलय् ‘चाकु दिवस व बृहत् सांस्कृतिक नापं हनेगु ज्याझ्वः जुइ।

नायः श्रेष्ठं टोखाय् उत्पादन जुगु ज्वलंतय्त नं चाकु दिवसय् न्ह्यब्वयेगु खँ कनादिल। टोखाय् तु खेती जुइगु पुलांगु बजाः खः। येँया उत्तरी लागाय् च्वंगु टोखा नेपालभाषाया ‘टु’ व ‘ख्यः’ खँग्वःपाखे वःगु खः।

तु खेती जुइगु टोखाय् लिच्छवीकालया न्यासः व १९ निसें चाकु दयेकेगु सुरु जुगु किंवदन्ती दु। टोखाय् थौंकन्हय् चाकुया १४ गू उद्योगत दु। टोखा नगरपालिकां टोखा लागाया म्हसीकायात ल्यंका तयेत टोखा बजारय् तुपिइगु ज्याझ्वःयात नं न्ह्याकेत्यंगु दु।

अथे हे टोखाया म्हसीकाया कथं चाकु स्तम्भ तकं टोखाय् निर्माण यायेत्यंगु दु।

Categorized in राष्ट्रिय