महाअभियान न्ह्याःगु खुसःगू वाःलिपा स्थानीय सरकारया हे न्ह्यपलाखय् सुचुकुचु यायेगु ज्याय् अभियानकःमित न्ह्यज्याःगु दु ।

येँ महानगरपालिका–८ या नेतृत्वय् जूगु सुचुकुचु अभियान पशुपति लागाय् केन्द्रित जूगु दु। पशुपति लागाया थीथी थासय् याःगु सुचुकुचुं न्हय्गु मेट्रिक टन फोहर व्यवस्थापन जूगु अभियानकःमि किशोरसिंह शाहीं धयादिगु दु।

सुचुकुचुया झ्वलय् मुंकूगु फोहर येँ महानगरपालिका वातावरण विभागपाखें व्यवस्थापन याःगु खः। सुचुकुचु अभियानय् पुलांम्ह मुख्यसचिव लिसें सुचुकुचु अभियानकःमि लीलामणि पौड्याल, अधिकार सम्पन्न बागमती सभ्यता एकीकृत विकास समितिया आयोजना प्रमुख नारायण भण्डारी, येँ महानगरपालिका–८ या वडाध्यक्ष आशामान संगत, वडा नं ११ या वडाध्यक्ष हीरालाल तण्डुकारलिसेंया जनप्रतिनिधि व अभियानकःमितय्सं ब्वतिकाःगु खः।

विसं २०७० जेठ ५ गतेनिसें न्ह्याःगु सुचुकुचु अभियान शनिबाः पतिकं सुथय् निघौं बागमती सिथय् ह्याका वयाच्वंगु दु। वंगु बुधबाः येँ महानगरपालि–११ य् बागमती सिथय् लाःगु येँ महानगरपालिकाया झिगू वडाया वडाध्यक्षपिन्सं ब्वतिकाःगु मुँज्यापाखें सुचुकुचुया जिम्मा वडां हे कायेगु सहमति जूगु खः।

Categorized in राष्ट्रिय