स्वसः व न्यय्दँ न्ह्यः अथे धयाःगु नेपाल संवत् ७८७ सिबें न्ह्यःनिसें दँय् दसं माघ १ गते न्यायेकाः वयाच्वंगु महादान ‘सम्यक दान पर्व’य् थुगुसिइ निद्वः भिक्षुया तय्त महादान याइगु जूगु दु।

शनिबाः सम्यक महादान व्यवस्थापन ग्वाहालि समितिपाखें ग्वसाः ग्वःगु पत्रकार सम्मेलनय् समितिया नायः गणेश बज्राचार्यं ख्वप नगरपालिका–१य् च्वंगु जयकीर्ति महाविहार (थथुबही) लागाया भुइख्यलय् जुइगु बौद्ध परम्पराकथंया सम्यक महादान पर्वय् भिक्षुतय्त महादान यायेगु तयारी जुयाच्वंगु धयादिल।

न्याम्ह दीपंकर बुद्धया झ्वाता तय्त स्थानीय थथुबहीइ विराजमान याकाः बुद्ध ज्ञान कयातःपिं शाक्य व बज्राचार्यया सकल भिक्षुपिंत प्रसाद, जाकिलिसें थीथी परिकार दान बिइगु व न्याम्ह दीपंकरयात चाःहिका पूजानापं बियाः हनिगु धकाः वय्कलं धयादिल। ख्वप लाय्कू नापं लाःगु लोकंह्वाःगु चतुब्र्रह्म महाविहारया संघ दुजः जयरत्न बज्राचार्यं नेपाल संवत् ७८७ स थः मदुम्ह अबू जयदेव बज्राचार्यया नामं दीपंकर बुद्धलिसेंया विहारया संघ दुजःतयेत ब्वनाः सम्यक भोजन दान यानाः थुगु पर्व नीस्वंगु धकाः शिलापत्रय् न्ह्यथना तःगु वय्कलं धयादिल।

उगु इलय् जयकीर्ति महाविहार तसकं जीर्ण अवस्थाय् थ्यंगुलिं जयरत्न बज्राचार्यपाखें हे नेपाल संवत् ७९४य् उगु विहारया जिर्णाेद्धार यानाः वहे दँय् जुजु जयजितामित्र मल्ल नापं न्ह्यःनेतयाः सम्यक महादान तःजिक न्यायेकूगु इतिहासय् न्ह्यथनातःगु दु। सम्यक दानय् परम्परागत कथं पलिस्था जूगु बौद्ध विहारय् दीक्षित जुयाच्वंपिं गृहस्थ बौद्ध भिक्षुपिं शाक्य व बज्राचार्यपिंत भोजन, अन्न व दक्षिणा बिइगु चलन दूगु समितिया सल्लाहकार सप्तचन्द्र बज्राचार्यं धयादिल। थुगुसिइ सम्यक दान पर्व न्यायेकेगु पाः सप्तचन्द्र बज्राचार्यलिसेंया छेँजःया जूगुलिं जयकीर्ति महाविहारय् छवाः न्ह्यःनिसें हे बाय्च्वना पर्वया निंतिं माःगु विशेष कथंया पुरी, लड्डुलिसें मेमेगु ज्वलंया व्यवस्थापनय् व्यस्त जुयाच्वनाःगु समितिया राजुमन बज्राचार्यं धयादिल।

थुगुसिइ पर्व स्वःवइपिं नापं सम्यक दान काइपिं बौद्ध धर्मावलम्बीपिं न्हापान्हापा सिबें अप्वः दइगु अनुमान यानाः व हे कथंया तयारी जुयाच्वंगु वय्कलं धयादिल । सम्यक महादानया झ्वलय् जयकीर्ति महाविहार (थथुबही) लागाया भुइख्यलय् चतुब्र्रह्म महाविहार संघया कूल द्यः हेबज्र नैरात्मायात दकसिबे न्हापां भोजन बिइगु परम्परा दु।

व धुंकाः कथहं मू दीपंकर, बाहाःछेँ दीपंकर, झौरबही दीपंकर, थथुबही दीपंकर व क्वथुबही दीपकंकरयात भोजन छाइगु याइ। अथे हे झ्वःलाकं तयातइपिं प्यम्ह सम्यक द्यः (सुवर्ण दीपंकरया झ्वाता), सुवर्ण चैत्य, स्थविर आजु, मू गुर्जू, गुर्जूपिं व झ्वःलाक्क च्वनाच्वंपिं सलंसः बज्राचार्य, बुद्धाचार्य व शाक्य छेँजःया दुजःपिंत सम्यक दान बिइगु परम्परा दु।

Categorized in राष्ट्रिय