नेवाः परम्परा कथं इहि मयापिं सच्छि व स्वीच्याम्ह कन्या कुमारी मस्तय्गु पुजा क्वचाःगु दु ।

कामपाया १२ वडा ह्यूमतय् ह्यूमत मिसा पुचःया ग्वसालय् जूगु स्वक्वःगु कन्या कुमारी पुजाय् वज्रयान पुजा विधि कथं १३८ म्ह मिसा मचातय्त पूजा याःगु खः । बसन्तपुरय् बिराजमान राजकीय कुमारीयात पूजा यानाः कन्यापुजा न्ह्याकूगु खः।

उगु पुजाय् त्वाःया च्याम्ह थकालीपिनिगु उपस्थिति दूगु खः । येँ महानगरया उपमेयर सुनिता डंगोल मूपाहाँ कथं झायादीगु उगु पुजाय् साँखु नगरपालिकाया उपमेयर समिता श्रेष्ठ, कामपा १२ वडाया अध्यक्ष बालकृष्ण महर्जन, ज्यापु महागुथि, यँे महानगर समितिया अध्यक्ष पञ्च नारायण व ज्यापु संस्कृति विकास कोषया नायः मंगल महर्जनपिन्सं नं पुजा यानादीगु खः।

पुजाय् ब्वति काःपिं कन्या मस्तय् थःथितिपिन्सं नं दक्षिण नापं मिसा मचातय्त माःगु हलंज्वलं लःल्हाःगु खः । नायः मचननी महर्जनं ह्यूमत मिसा पुचलं जीवित कुमारी संस्कृतिया संरक्षण व विकास यायेगु कुतःया झ्वलय् स्वक्वःगु खुसिइ कन्याकुमारी पुजाया ग्वसाः ग्वयागु जानकारी बियादीगु खः।

वय्कलं स्वक्वःतक देय्या थीथी थासय् बिराजमान जीवित कुमारी पुजा, पूर्व कुमारी पुजा यायेधुनागु व कन्या मस्तय्गु पुजा लिपा येँया क्बहाल, मूबहाल, चाबहिल, पनौतिइ कुमारी जुयादीपिं पुलांपिं कुमारीतय्गु लगत मुना सम्मान व पूजा यायेगु जानकारी नं बियादीगु दु।

Categorized in राष्ट्रिय