राष्ट्रपति रामचन्द्र पौडेलं देशय् न्ह्यःने वयाच्वंगु समस्या ज्यंकाः सकसितं छप्प छधीइ जुयाः न्ह्यावनेत इनाप यानादीगु दु।

घ्यः चाकु संल्हु÷माघीया झ्वलय् राष्ट्रपति भवनय् थौं ग्वसाः ग्वंगु चियापान ज्याझ्वलय् वय्कलं सुशासन, विकास व शान्ति नेपाःमितय्गु मनतुना खः धकाः धयादिल। राष्ट्रपति पौडेलं झीगु संविधान व सङ्घीय लोकतान्त्रिक गणतान्त्रिक शासन प्रणालीया मू आज्जु नं देसय् सुशासन, विकास व शान्ति दयेकेगु हे खः धकाः धयादिल।

वय्कलं थी थी जातजाति तय्सं उत्सवकथं न्यायेकीगु थुगु कथंया नखः नं नेपाःमि दथुइ थ वं थः प्रेम, भ्रातृत्व नापं मेलमिलापया भावना अप्वयेकाः सकसितं छवाःया सूत्रय् कःघायेत व राष्ट्रिय एकतायात सुदृढ यायेत योगदान बिइगु भलसा कयादिल।

उगु ज्याझ्वलय् उपराष्ट्रपति रामसहाय प्रसाद यादव, प्रधानमन्त्री केपी शर्मा ओली, सभामुख देवराज घिमिरे, राष्ट्रिय सभा अध्यक्ष नारायणप्रसाद दाहाल, पूर्व राष्ट्रपतिपि रामवरण यादव व विद्यादेवी भण्डारी, पूर्वप्रधानमन्त्री, उपप्रधानमन्त्री, मन्त्री, सांसदपिनिगु ब्बति दुगु खः। स्रोत रासस

Categorized in राष्ट्रिय