ख्वपय् सूर्यमढीइ थौं धार्मिक महत्वया तान्त्रिक विधियुक्त प्रसिद्ध नवदुर्गा देवगणया ‘ङालाकेगु जात्रा’ (न्याँ लायेगु जात्रा) जुइत्यंगु दु।

दँय् दसं ख्वप नगरपालिकाया थी थी २१ गू थासय् प्रदर्शन याइगु नवदुर्गा देवगणया ङालाकेगु जात्रा सूर्यमढीं सुरु यायेगु परम्परा कथं हे जात्रा जुइत्यंगु खः।

सूर्यमढीइ ङालाकेगु जात्रा यायेत वंगु पुस २९ गते ‘वापी पाछाकिगु’ जात्रा याःगु खः धाःसा मङ्गलबाः घ्यः चाकु सँल्हु कुन्हु सनिलय् देवगणत सूर्यमढी त्वालय् चाःहिलाः चान्हय् खःप्याखं न्ह्यब्वयाः च्याम्हासिंह लागाय् ‘मुःवाहा जात्रा’ याःगु खः। ङालाकेगु जात्राय् जात्रा जुइगु थाय्या त्वालय् चाःहिले धुंकाः चान्हय् ङालाकेगु थासय् फुक्कं देवगणतय्गु ‘खःप्याखं’ न्ह्यब्वयेगु, ‘मूःबाहा जात्रा’ व ‘चा प्याखं’ याइगु परम्परा न्ह्यावयाच्वंगु दु।

गुगु कथं बुधबाः सूर्यमढीइ बाराही प्याखं; सिम्ह दुम्हया प्याखं नापं ङालाकेगु जात्रा याइ। न्हिनय् महाकाली प्याखं, सनिलय् महाकाली व श्वेत भैरवया ‘गा तोकेगु प्याखं’ याइ। अनंलिपा सिम्ह दुम्ह व श्वेत भैरवया ‘नाः होलेगु प्याखं’ लिसें श्वेत भैरवया ङालाकेगु जात्रा जुइ।

ङालाकेगु जात्रा क्वचाये धुंकाः सिम्ह दुम्ह व श्वेत भैरवया ‘प्वास्याकेगु प्याखं’; बालकुमारी (इन्द्रायणी) व श्वेत भैरवया ‘मतिना प्याखं’; सिम्ह दुम्ह व श्वेत भैरवया ‘वसः हियेगु प्याखं’ व दकसिबे ल्यूने श्वेत भैरवया प्याखं न्ह्यब्वइगु नवदुर्गा देवगण जात्रा नापं देगः व्यवस्थापन संस्थाया सल्लाहकार नारायण वनमालां कनादिल।

Categorized in राष्ट्रिय