च्वमि नापं पत्रकार श्रीधर खनालया ९४ दँय् थौं मन्त। ‘दीर्घबाहु’ उपनामं जासुसी उपन्यास च्वयादीम्ह वय्कः नीगू दशकया ‘मुर्कुट्टा लाश, मेजरको सर्प, बिखालु इच्छापत्र, छ औँले मान्छे, बाह्र बजेको घण्टी, पानको गुलाम, नाङ्गिएकी सुन्दरी’ या हुनिं लोकंह्वाःम्ह च्वमि खः।

पिहांवःगु शब्द भेदी लडाई वय्कःया लोकंह्वाःगु जासुसी उपन्यास खः। अथे हे ‘नमरी संसार देखिन्न, उल्लीबिल्ली, चट्याङचुटुङ’ हास्यव्यङ्ग्यया कृति नं उत्तिकं हे लोकंह्वाःगु, वय्कःया कृति सूक्ष्म अध्ययन यानादीम्ह डा रमेशचन्द्र न्यौपानें धयादिल।

स्वीगू दशकय् रमेशनाथ पाण्डेया सम्पादनय् पिदनिगु ‘नयाँ सन्देश’ अखबारया लिपांगु पृष्ठय् ‘विश्वामित्र नामं यौन प्रधान आख्यान नं वय्कलं च्वयादीगु डा न्यौपानें लुमंकाः दी।

८४ दँय् तक मोटरसाइकल गया जुइफुम्ह वय्कलं निर्भीक पत्रकारिता यानादीम्ह धकाः अप्पो स्वया म्हसिकी। वय्कःया छम्ह काय् व्रजेश खनाल नं युवापुस्ता न्ह्यःने लोकंह्वाम्ह च्वमिया कथं नां जाः।

पारिवारिक स्रोतया कथं थौं पशुपति आर्यघाटय् वय्कःया अन्त्येष्टि जूगु दु। वय्कःया खुम्ह म्हयाय्पिं दु।

Categorized in राष्ट्रिय