काठमाडौँ विश्वविद्यालय व धुलिखेल अस्पतालदथुइ प्यदँ निसें जुयाच्वंगु कचवं ज्यंगु दु। कचवं ज्यंकेत दयेकूगु सहजीकरण समितिया सुझाःलिसेंया प्रतिवेदन थौं जूगु विश्वविद्यालय सभाया ९८ क्वःगु मुँज्यां स्वीकार याःलिसें हे निगुलिं संस्थाया सम्बन्ध न्हापाथें हे बांलाःगु खः।

प्रधानमन्त्री नापं कुलपति केपी शर्मा ओलीया अध्यक्षताय् थौं जूगु सभाया मुँज्यां कचवं ज्यंकेत राष्ट्रिय योजना आयोगया दुजः गीताकुमारी पौड्याल अधिकारीया संयोजकत्वय् गठन जूगु न्हय्म्ह दुजः सहजीकरण समितिया प्रतिवेदनयात पारित याःगु खः। प्रतिवेदन कथं स्वलाया दुने न्हूगु सम्झौता तयारी यायेत आयोगया दुजः अधिकारी हे संयोजक जुयादीगु समिति नं गठन याःगु दु। प्रधानमन्त्रीया निजी सचिवालयया कथं समिति विश्वविद्यालयपाखें प्राडा ऋषिकेश वाग्ले व प्रा डा मनोज हुमागाई नापं अस्पतालपाखें डा विराजमान कर्माचार्य व प्रा डा राजीव श्रेष्ठ च्वनादीगु दु। समितिं न्हूगु सम्झौताया मस्यौदा वइगु सिनेटय् न्ह्यब्वइ।

सम्झौता मजूतले निगुलिं संस्थाया न्हिंन्हिं सञ्चालन सम्बन्धित सङ्कायया डीन व प्रशासकीय निर्देशक दूगु स्वम्ह दुजःया अन्तरिम सहजीकरण समिति नं गठन जूगु दु।थ्व स्वयां न्ह्यःया सिनेट मुँज्याय् विश्वविद्यालयया कुलपति नापं प्रधानमन्त्री ओलीं अन्तर्राष्ट्रियस्तरय् तकं लोकंह्वाःगु उगु निगुलिं संस्था थवंथः मिले जुयावनेगु पाय्छि जुइगुलिं ब्यागलं वनेगु प्रस्ताव महयेत नं इनाप यानादीगु खः। वि.सं. २०५९ चैत १९ गतेया थवंथः सम्झौताया आधारय् मंकाः ज्या याःगु उगु संस्थात दथुइ कचवं वःगुलिं वंगु साउन ३० गतेया विश्वविद्यालय सभाया ९७ क्वःगु मुँज्यां लँपु क्यं कथं थवंथः खँल्हाबल्हा ब्याकेगु क्वःछ्यूगु खः।

निगू कार्यकाल उपकुलपति जुइधुंकूपिंसं नं आवेदन बिइ दइगु नापं हरेक कार्यकालया निंतिं कार्यविधि संशोधन जुयाच्वनीगु स्थितियात मुँज्याय् ध्यानाकर्षण याःगु खः। पूर्वउपकुलपति प्राडा सुरेशराज शर्माया संयोजकत्वय् गठन जूगु खोज नापं सिफारिस समितिं चिकित्साशास्त्र सङ्कायया शिक्षकतय्त नं कःघायेत उम्मेदवार ल्ययेगु कार्यविधिइ संशोधन यानाः पुनः सुचं पिथनीगु जूगु दु।

Categorized in राष्ट्रिय