सञ्चार नापं सूचना प्रविधिमन्त्री पृथ्वीसुब्बा गुरुङं सार्वजनिक सेवा प्रसारणयात स्वायत्त दयेकेगु धकाः धयादीगु दु।

थुकियात जनसरोकारया विषयकय् राज्ययात थनीगु निकाय कथं विकास यायेत्यंगु वय्कलं धयादिल। त्रिभुवन विश्वविद्यालय पत्रकारिता नापं आमसञ्चार केन्द्रीय विभागं थौं थन ग्वसाः ग्वःगु ‘नेपालय् सार्वजनिक सेवा प्रसारण नीति’ खँल्हाबल्हा ज्याझ्वःयात संबोधन यानादिसें मन्त्री गुरुङं सार्वजनिक सेवा प्रसारणय् सत्ता शक्तिया किचः लाकय् बिइमज्यू धइगुलिइ सरकार सहमत जूगु धयादिल।

समावेशिता, पारदर्शिता नापं जनमुखी शासन नीस्वनेगु तातुना पूवंकेत सार्वजनिक सेवा प्रसारण प्रणाली न्ह्याकूगु वय्कःया धापू खः। सरकारी स्वामित्वया रेडियो नेपाल व नेपाल टेलिभिजनयात सार्वजनिक प्रसारण सेवाया हलिंन्यंकया मान्यता अनुरुप यंकेत संसदं वंगु असोज २२ गते सार्वजनिक सेवा प्रसारण सम्बन्धी विधेयक पारित याःगु खः।

वहे कथं वंगु कात्तिक २३ गतेनिसें रेडियो नेपाल व नेपाल टेलिभिजनयात सार्वजनिक प्रसारण सेवाय् दुथ्याकूगु खः। सरकारं सार्वजनिक सेवा प्रसारणयात अन्तर्राष्ट्रिय अभ्यास अध्ययन यानाः देय्या परिस्थिति व आवश्यकता कथं न्ह्याकेत्यंगु मन्त्री गुरुङं धयादिल। उकिया निंतिं ऐन कानुनय् पाय्छि कथं सुधारनापं आर्थिक रुपं आत्मनिर्भर जुइकेगु कुतः सरकारं याइगु वय्कलं धयादिल।

सार्वजनिक सेवा प्रसारणं देय्या दक्व निकायतय्गु ज्या, इमिगु जवाफदेहिता व जनतातय्त लाःगु प्रभाव मालेमाःगु नापं उकिया निंतिं आलोचनात्मक चेत आवश्यक जू धइगु मन्त्री गुरुङया धापू दु। रेडियो नेपाल व नेपाल टेलिभिजन वंगु माध्यमकथ इलय् उबलय्या सरकारया ग्वाहालिमि कथं जक जुयाच्वंगु म्हसीकापाखें सर्वसाधारण तय्गु सः पिज्वइगु हिइकेगु कुतः जूगु वय्कलं धयादिल।

“नकतिनि धइथें हःगु कानुनय् छुं मछिंगु व मगाः मचाःगु दःसां नं भिंकाः यंकेगु जुइ”, मन्त्री गुरुङं धयादिल। सार्वजनिक सेवा प्रसारणया निमित्त प्रमुख प्रशासकीय अधिकृत विष्णुराम न्यौपानें विज्ञतलिसेया सहलहं वःगु सुझाब तय्त वइगु इलय् लँपु कथं कयायंकेगु धकाः धयादिल।

उगु ज्याझ्वलय् नेपाल पत्रकार महासङ्घया पूर्वनायः तारानाथ दाहाल, सार्वजनिक प्रसारण विज्ञ रघु मैनाली व त्रिवि केन्द्रीय पत्रकारिता विभागया घमराज लुइँटेलं सार्वजनिक सेवा प्रसारणया हलिंन्यंकं अभ्यास, नेपालय् नकतिनि धइथें पिदंगु थ्वसम्बन्धी कानुन व आःया संरचना नापं वइगु कार्यदिशाबारे कार्यपत्र पेस यानादिल।

Categorized in राष्ट्रिय