छितः छुं नं न्हूगु फोनल्याखं फोन यानाहःगु दु ला? वा छुं नं न्हूगु इमेल आइडीपाखें प्रलोभन बिइगु कथंया सन्देशत वयाच्वंगु दु? यदि वयाच्वंगु दु धाःसा सावधान !

अजाःगु इमेल वा ल्याखं वःगु सन्देश व खँल्हाबल्हाय् भलसा यानादीमते। उकिं छित छेँ बुँ मदयेका बिइगु तकं यायेफु। नेपाल प्रहरी, साइबर ब्यूरोया प्रवक्ता, प्रहरी उपरीक्षक दीपकराज अवस्थीं अजाःगु फोन मल्वनेत व अजाःगु इमेलया भलसा मयायेत व लिसः तकं मबिइत इनाप यानादिल।

अथे म्हमस्यूम्ह मनूखं धाःगु नापं मस्यूम्ह इमेलं वःगु सन्देशया भरय् च्वनाः व लिसः बियाः मनूत ठगे जुगुलिं थजाःगुलिइ विशेष सावधानी यानाच्वनेत वय्कलं इनाप यानादीगु खः। प्रहरी उपरीक्षक अवस्थीं लिपांगु इलय् साइबर ब्यूरोलिसें नेपाल प्रहरीया विशिष्टीकृत ज्याकुथित व नेपाल प्रहरीया हे उच्च अधिकारीतय्गु नां व दर्जा छ्यलाः थी थी मनूतय्त चेतावनीयुक्त इमेल वयाच्वंगु थें जाःगु गुनासोत नेपाल प्रहरी प्रधान ज्याकुथि, साइबर ब्यूरोय् वयाच्वंगुलिं उकिइ ब्यूरोया गम्भीर ध्यानाकर्षण जूगु दु धकाः धयादिल।

वय्कलं धयादिल, “नेपाल प्रहरी साइबर ब्यूरोलिसें मेगु प्रहरी ज्याकुथिपाखें वःगु थजाःगु इमेलत नक्कली जुगुलिं उगु कथंया मेलया भलसा मयायेत नापं छुं नं लिसः बियामदीत सकसितं इनाप यानागु दु।” अथे वःगु इमेलया सम्बन्धय् आवश्यक अनुसन्धान जुयाच्वंगु नापं छुं शङ्का जूसा ब्यूरोया आधिकारिक वेबसाइट cyberbureau=nepalpolice=gov=npय् च्वंगु सम्पर्क ल्याखय् फोन व इमेलं सुचं बियादीत नं इनाप याःगु दु।

ब्यूरों छगू सार्वजनिक सुचं पिथनाः अजाःगु ज्याखँय् सचेत जुइत व छुं नं शङ्का जूसा लिक्कच्वंगु प्रहरीइ सुचं बिइत नं इनाप याःगु दु। 

Categorized in राष्ट्रिय