नीस्वन मीनकुमारी राणा प्रतिष्ठानं समाजसेवी स्वर्गीय मीनकुमारी राणाया स्वक्वःगु पुण्यतिथिइ ‘प्रजातन्त्र सेनानी, वरिष्ठ पत्रकार व वरिष्ठ कासामि’ सिरपाः बिइ ल्वःम्ह पात्र ल्ययेत प्रतिष्ठानया नायः कवीर राणाया कजिसुइ न्याम्ह दुजःया समिति नीस्वंगु दु।

प्रतिष्ठानं दँय्दसं मीनकुमारी राणाया वार्षिक पुण्यतिथिइ स्वंगू विधाय् सिरपाः व छगू विद्यालययात छात्रवृत्ति बियावयाच्वंगु प्रतिष्ठानया महासचिव रवि राणां कनादिल । नायः राणाया कजिसुइ नीस्वंगु समितिइ वरिष्ठ साहित्यकार डा ध्रुवचन्द्र गौतम, वरिष्ठ पत्रकार हरिहर विरही व प्रजातन्त्र सेनानी माथवरसिंह बस्नेत च्वनादीगु दु धाःसा सदस्य सचिव नं महासचिव रवि राणा हे खः।

प्रतिष्ठानया कथं दक्व सिरपाःया ध्यबा ५१ द्वः व १ तका दु। स्वक्वःगु पुण्यतिथिकुन्हु मदुम्ह मीनकुमारी राणाया झ्वाता उलेज्या व मीनकुमारी राणाया नामय् लँया नां तयेगु नं यायेत्यंगु दु।

न्हापांगु पुण्यतिथिइ वरिष्ठ साहित्यकार डा ध्रुवचन्द्र गौतम, वरिष्ठ पत्रकार हरिहर विरही, प्रजातन्त्र सेनानी माथवरसिंह बस्नेत व वरिष्ठ कासामि नापं बक्सिङ स्यनामि मदन गुरुङयात राष्ट्रपति डा रामवरण यादवं सिरपाः बियादीगु खः धाःसा निक्वःगु पुण्य तिथिइ प्रजातन्त्र सेनानी सम्मानपाखें पूर्व सांसद लेखनाथ न्यौपाने, वरिष्ठ पत्रकार किशोर नेपाल व वरिष्ठ बक्सिङ स्यनामि प्रकाश थापामगरयात राष्ट्रपति रामचन्द्र पौडेलं सिरपाः बियादीगु खः।

व स्वयां न्ह्यः राणाया छेँजःपिंसं ब्वंगु ख्वपया सानोठिमीइ च्वंगु आदर्श माध्यामिक विद्यालयया जेहन्दार विद्यार्थीयात बिइगुकथं ५१ द्वः छम्ह पूर्वविद्यार्थी समाजया नायः वरिष्ठ गीतकार सुवासचन्द्र ढुङ्गेलयात लःल्हानादीगु खः।

Categorized in राष्ट्रिय