बागमती प्रदेश समन्वय परिषदय न्याक्वःगु मुँज्यां याःगु थी थी २३ गू निर्णय राष्ट्रिय समन्वय परिषदय् छ्वयेगु क्वःछ्यूगु दु।

राजधानी हेटौँडाय् बिहीबाःनिसें न्ह्याःगु उगु मुँज्यां परिषदय् छ्वयेगु न्हय्गू व प्रदेशं छ्यला बुलाय् हयेमाःगु १६ गू निर्णय याःगु खः। मुँज्यां आइइई, इआइएलिपा सिमा कटानया व्यवस्था प्रदेशपाखे यायेगु दयेकेत, रञ्जुमार्ग(रोप–वे)या स्वामित्व प्रदेशयात बिइमाःगुलिसेंया बिषय राष्ट्रिय समन्वय परिषदय् सिफारिस यायेगु क्वःछ्यूगु खः।

मुँज्यां विद्युत् विधेयक शीघ्र पारित याकेत व विपद् प्रभावित लागाया पुनर्निर्माणया बजेट उपलब्ध याकेगु निर्णय राष्ट्रिय समन्वय परिषदय् सिफारिस यायेगु नं क्वःछ्यूगु दु। सार्वजनिक खरिद ऐनय् संशोधन यानाः पुरातात्विक महत्त्वया सम्पदातय्गु पुनर्निर्माण यायेत विशेष कानुनी व्यवस्था यायेमाःगु निर्णय यानाः सिफारिस याःगु दु धाःसा खुद्वःनिसें न्हय्द्वः मिटरतकया च्वापुगुँ आरोहण इजाजत व रोयल्टीसम्बन्धी अधिकार प्रदेशयात बिइमाःगु निर्णय नं याःगु दु।

अथे हे मुँज्यां बागमती प्रदेश व स्थानीय तहय् ज्या यानाच्वंपिं कर्मचारी तय्गु वैयक्तिक सुचं प्रणालीया दर्ता व व्यवस्थापनया निंतिं राष्ट्रिय किताबखानालिसे समन्वय यानाः सुचं प्रणाली नीस्वनेगु व न्ह्याकेगुलिसेंया निर्णय याःगु दु। सङ्घ, प्रदेश व स्थानीय तह ऐन, २०७७ या दफा २४ (१) या व्यवस्था कथं परिषदया मुँज्या च्वंगु खः। मुख्यमन्त्री बहादुरसिंह लामाया नायःसुइ बिहीबाःनिसें न्ह्याःगु मुँज्याय् प्रदेश सरकारया मन्त्रीत, स्थानीय जनप्रतिनिधि, जिल्ला समन्वय समितिया प्रमुख ललित घलानलिसें झायादीगु खः।

मुख्यमन्त्री नापं मन्त्रिपरिषद् ज्याकुथिया सचिव वेदप्रसाद भण्डारीं प्रदेश नापं स्थानीय तहया कर्मचारी व्यवस्थापन, आन्तरिक मामिला व कानुन मन्त्रालयया सचिव पूर्णबहादुर दर्जीं विपद् व्यवस्थापन व थुकिया हाथ्या लिसें आर्थिक मामिला व योजना मन्त्रालयया सचिव कृष्ण मैनालीं अन्तरसरकारी वित्तीय हस्तान्तरण व राजस्व इनेगु विषयकय् कार्यपत्र न्ह्यब्वयादीगु खः। कार्यपत्रय् जूगु सहलहय् गाउँपालिका महासङ्घ बागमती प्रदेशया अध्यक्ष कर्णबहादुर मगरं प्रदेश लोकसेवा आयोग व सुशासन केन्द्रयात क्रियाशील जुइकेत सरकारया ध्यानाकर्षण यानादीगु खः।

अथे हे रसुवाया उत्तरगया गाउँपालिका उपाध्यक्ष चमेली गुरुङं जनप्रतिनिधितय्गु निंतिं क्षमता अभिवृद्धि यायेगु तालिम न्ह्याकेमाःगुलिइ बः बियादीगु खः। जिल्ला समन्वय समिति काभ्रेया प्रमुख दीपकप्रसाद गौतमं डोजरे विकासयात निरुत्साहित यायेमाःगु धयादिल। आन्तरिक स्रोतया नामय् प्रकृतिया दोहन जुइगु ज्या जुयाच्वंगु वय्कःया धारणा खः।

रामेछाप नगरपालिका प्रमुख लवश्री न्यौपानें दीर्घकालीन जुइगुकथं भौतिक संरचना निर्माणय् खनेदूगु समस्यायात ज्यंकेमाःगुलिइ बः बियादिल। स्वंगुलिं तहया सरकार दथुइ अधिकार इनेगु, विकास निर्माण, कानुन निर्माणय् समन्वय नापं सहकार्य व पिहाँवःगु कचवं खँल्हाबल्हापाखे ज्यंकेत सहजीकरण यायेत परिषदया मुँज्या च्वनेगु याइ। थ्वस्वयां न्ह्यः बागमती प्रदेशय् २०७५ जेठ ७ व ८ गते न्हापांगु मुँज्या, २०७६ जेठ २९ व ३० गते निक्वःगु मुँज्या, २०७७ चैत १२ गते स्वक्वःगु मुँज्या व २०८१ जेठ १० गते प्यक्वःगु मुँज्या च्वंगु खः ।

Categorized in राष्ट्रिय