दँय् दसं पञ्चाङ समिति पिकाइगु विक्रम संवतया तिथि पतिइ जात्रा पर्वनिसें कयाः नखः चखःया साइत तयाः तिथि पौ पिकाना च्वंगुलिं थुकिं नेवाःपि दथुइ भ्रम ब्वलना च्वंगुलिं नेपाल संवत न्हूदँ राष्ट्रिय समारोह समितिं नेपाल पञ्चाङ निर्णायक समितियात ध्यानाकर्षण याकूगु दु।

समारोह समितिया नायः राजेन्द्र प्रसाद श्रेष्ठ, संरक्षक मल्ल के सुन्दरया नेतृत्वय् म्हिगः आइतवाः पञ्चाङ समितिया ज्याकुथिइ वनाः थथे ध्यानाकर्षण याकूगु खः।समितिया नायः राजेन्द्र श्रेष्ठं वि.सं. २०८२ सालया क्यालेण्डरय् थथे नखः चखः व जात्रापर्वय् साइत तयेगु ज्या मयायेत इनाप यासें नेवाःतय्गु संस्कृति कथं स्वन्ति नखः स्वन्हुयंकं झ्वलाक्क जुइगु व गुलिखे नखः चखः नं सुथय् छु तिथि क्यन, न्हिच्छि उगु हे तिथि जुइगु धासें छन्हुं हे निगू तिथि क्यंकाः साइत पिकायेगु ज्या मयायेत इनाप यानादीगु खः।

वय्कलं म्हतिं नं न्हूगु क्यालेण्डर २०८२ पञ्चाङ समितिं नेवाःतय्गु स्वन्हु यंकंया स्वन्ति नखः नेवाःतसें न्यायेकीगु नखः धकाः जूसां नं स्वन्हु यंकं झ्वलाक्क तयेत नं इनाप यानादिल।अथेहे, समारोह समितिया संरक्षक मल्ल के सुन्दरं नं नेवाःतसें पञ्चाङ समिति पलिस्था मजूनिगु इलंनिसें हे थःपिनिगु नखः झ्वलाक्क हनाः वयाच्वंगु खँ न्ह्यथनादिसें क्यालेण्डरय् साइत तयेगु ज्यां यानाः नेवाःतय् दथुइ नखः चखः न्यायेकेत समस्या जुयाच्वंगु खँ तयादीगु खः।

नेपाल संवत न्हूदँ राष्ट्रिय संरक्षण समाजया कजि प्रा.डा. नरेशमान बज्राचार्यं नेवाःतय्गु नखःचखः घडी पला व साइत स्वयाः न्यायेकेगु चलन मदूगु खँ कनादिसें सुथसिया सुद्र्यः लुइवः मेगु दिंया सुद्र्यः मलूतले छगू हे तिथि जुइगु व थुगु हे परम्परा कथं नेवाःतसें झ्वःलाक्क नखः न्यायेकाः वयाच्वंगु धासें क्यालेण्डरय् साइत तयेगु याना हःगुलिं नेवाः समाजया एकताय् समस्या वःगु खँ तयादिल ।

वय्कलं पञ्चाङ समितिं नखः चखः अःपुक न्यायेकेफइगु कथं थौंया ईयात ल्वःकथं पितबिइमाःगु विचाः तयादीगु खः। नेवाः देय् दबूया नायः पवित्र बज्राचार्यं पञ्चाङ समितियात तःकः हे थ्व विषयस थःपिन्सं ध्यानाकर्षण याकूगु खँ तयादिसें नेवाःतसें हनाः वयाच्वंगु नखःचखःयात भ्रम मब्वलनीगु कथं ज्या यायेत थःगु विचाः तयादीगु खः।

पञ्चाङ समितिया नायः श्रीकृष्ण अधिकारीं पञ्चाङ समितिं ज्योतिष विज्ञान कथं क्यालेण्डर तयार यायेगु यानाच्वनागु व ज्योतिष विज्ञान दुने सूर्य, नक्षत्र, ग्रह, घडी, पला गुकथं दु उकियात स्वयाः पिहाँ वइगु दिं व ईयात हे अध्ययन यानाः थथे क्यालेण्डर पिकायेगु यानाच्वनागु खँ कनादिल। वय्कलं न्हापा न्हापा क्यालेण्डरय् साइत तयेगु प्रचलन मदूगु खँयात स्वीकार यासें साइत राजदरबारयात जक बिइगु यानाच्वनागु खँ नं कनादीगु खः।

समितिया नायः अधिकारीं नेवाःतय्गु नखः जात्रापर्व अलमल यायेगु आज्जु तयाः पञ्चाङ समितिं ज्या यानाः मच्वंगु धासें नेवाः परम्परा कथं नखः झ्वःलाक्क क्यालेण्डरय् तयेगु नितिं येँ, यल व ख्वपया हनेबहःपिंपाखें छगू हे विचाः ज्वनाः वल धाःसा न्हूगु क्यालेण्डरय् उकथं हे व्यवस्था यायेफइगु खँ कनादिसें क्यालेण्डर व पात्रय् साइत तयाः तःसां उगु हे क्यालेण्डरय् थःगु धर्म परम्परा कथं न्यायेके ज्यू धकाः न्ह्यथनातयागु जानकारी नं ब्यूगु खः।

पञ्चाङ समितियात थथे ध्यानाकर्षण याकेगु नितिं समारोह समितिया दुजःपिं विष्णु चित्रकार, ज्योति शाक्य, सुजीव बज्राचार्य, मचाराजा महर्जन, श्रीजन श्रेष्ठपिनिगु उपस्थित दुगु खः।

Categorized in राष्ट्रिय