परराष्ट्रमन्त्री डा आरजु राणा देउवां संयुक्त राज्य अमेरिकाया ७२ क्वःगु विदेशमन्त्रीइ मार्को रुबियो नियुक्त जुयादीगुलिं भिंतुना बियादीगु दु।

सामाजिक सञ्जाल एक्सपाखें वय्कलं नवनियुक्त अमेरिकाया समकक्षी रुबियोयात भिंतुना बियादीगु खः।परराष्ट्रमन्त्री देउवां भिंतुना बियादिसें नेपाः व अमेरिका दथुइ स्वापूयात अझ क्वातुका यंकेत विदेशमन्त्री रुबियोनाप मंकाः ज्या यायेत थः न्ह्याबलें तयार दु धका एक्सय् न्ह्यथनादीगु दु।

नवनियुक्त अमेरिकी विदेशमन्त्री रुबियो फ्लोरिडाया राज्यसभा दुजः खः। ५३ दँ दुम्ह वय्कःया नियुक्तिया प्रस्तावयात सिनेटपाखें ९९ गू मतं अनुमोदन याःगु खः। वय्कःयात विदेशमन्त्री नियुक्ति यायेत राष्ट्रपति डोनाल्ड ट्रम्पं न्ह्यब्वगु प्रस्तावया विपक्षय् छगू मत नं मवःगु अन्तरराष्ट्रिय सञ्चारमाध्यमं धाःगु दु।

Categorized in राष्ट्रिय