‘लुमन्तिइ तारादेवी’
हर्क बहादुर श्रेष्ठ | पोहेलागा नवमी ११४५, माघ १० बिहीवाः

नेपाली सांङ्गीतिक ख्यलय् ‘कोकिला, किन्नरी’ लिसेंया उपाधि कयादीम्ह म्ये हालामि तरादेवीयात लुमंकुसें ‘लुमन्तिइ तारादेवी’ सांस्कृतिक सनिल व हना ज्याझ्वः जूगु दु। बुधबाः जमःया सांस्कृतिक संस्थानय् तारादेवी फाउन्डेसनपाखें वय्कःया १९ क्वःगु लुमन्ति दिं लसताय् लाकाः ग्वसाः ग्वःगु ज्याझ्वलय् वय्कःया लोकंह्वाःगु म्येपाखें वय्कःयात लुमंकूगु दु।
फाउन्डेसनया संरक्षक रवि श्रेष्ठं थः मां तारादेवीं नेपाःया सांङ्गीतिक ख्यलय् यानादीगु योगदानयात लुमंकेगु, सहलह ब्याकेगु यायेगु नापनापं थ्वः हे ख्यलय् स्वानाः च्वंपिंत हनेगु तातुनां संस्था (फाउन्डेसन) नीस्वनाःगु धयादिल। वय्कलं धयादिल, “फाउन्डेसनपाखें मां (तारादेवी) या लुमन्तिइ न्हि लाकाः यानाःगु ज्याझ्वलं सङ्गीतकःमियात ग्वाहाली जुइमाः धयागु तायेका जिमिसं हनावयाच्वनाःगु खः। वय्कःया म्हगसःयात पूवंकेत फाउन्डेसनं ज्या यानाः तुं च्वनाःगु दु।” थुगु ज्याझ्वलय् लय्चिनामिं लिसें म्येच्वमि सिके रसाइली, तीर्थकुमारी थापालिसेंयात म्हःतिं नीन्याद्वः द्यबाः नापं हंगु खः।
च्यादँ दुबलेनिसें म्ये हालादीम्ह तारादेवीं सः बियादीगु ‘शुभकामना भरि’, ‘उकाली ओरालीहरुमा’, ‘साँघुरी बारी नि हो”, ‘त्यो धारा पानी’, ‘कालीपारि दाइ कति राम्रो’ लिसेंया म्येत थौंया पुस्ताय्तकं लोकं ह्वानाच्वंगु दनि। तारदेवीं च्यादँ दुबले निसें म्ये हालादीगु खः।
वय्कलं चाँदनी शाह, माधवप्रसाद घिमिरे लिसें यक्वःहे म्ये च्वमि व लय्चिनामिं नातिकाजीलिसेंया सङ्गीत संयोजनय् थःगु जीवंकाःछिया दुने प्यद्वःसिबें अप्वः म्ये हालादीगु दु। तारादेवीं २०६२ सालय् थ्व संसार त्वःता झायेधुंकाः वय्कःया साङ्गीतिक कृति, योगदान व यात्रायात म्वाकातयेगु तातुनां ‘तारादेवी स्मृति फाउन्डेसन’ नीस्वंगु ज्याझ्वलय् कंगु खः।
Categorized in मनोरन्जन