झिंन्याक्वःगु ब्वःया चितवन महोत्सव क्वचाःगु दु। चितवन उद्योग वाणिज्य संघया ग्वसालय् नारायणी खुसि सिथय् न्ह्याःगु महोत्सव न्यागू लखं मनूतय्स अवलोकन याःगु दु।

महोत्सव मूल समारोहया कजि सुमनकुमार श्रेष्ठया कथं महोत्सवय् ३० क्वःति ध्यबा बराबरया कारोवार जूगु खः। महोत्सवय् लजगाः मेला, ‘हार्डवयर्स एक्स्पो’, कस्ति परिसर, अटो परिसर, रेष्टुराँ परिसर, फनपार्क, चाइना एक्स्पो, लघु–घरेलु परिसर, कृषि परिसरलिसें प्यसः व ३० गू स्टल दूगु खः।

महोत्सव उद्योग व्यापारया प्रवद्र्धन, कला, साहित्य व तजिलजिया संरक्षण, आदिवासी जनजातिया परम्परा व वसःया जगेर्नाया नापनापं कृषि, पर्यटन, शिक्षा, स्वास्थ्य, ऊर्जा, सुचं प्रविधि व पूर्वाधारलिसेंया ख्यःया विकासया ह्वःताः चकंकेया निंतिं उपयोगी जूगु कजि श्रेष्ठं  धयादिल।

महोत्सवय् कृषि धेंधेंबल्ला, हस्तकलाया उत्पादन, लघु घरेलु उत्पादनया प्रदर्शनी, अटोमोबिललिसें औद्योगिक ब्वज्या व कृषि, शिक्षा, स्वास्थ्य, पर्यटन व सुचं प्रविधिइ गोष्ठीया नापनापं स्वास्थ्य शिविर नं ग्वसाः ग्वःगु खः। महोत्सव बागमती प्रदेशया मुख्यमन्त्री बहादुरसिंह लामाया उपस्थितिइ क्वचाःगु खः। मुख्यमन्त्री लामां व्यवसायमैत्री लकस दयेकेत प्रदेश सरकार न्ह्यानाच्वंगु दु धयादिल।

Categorized in राष्ट्रिय