सभामुख देवराज घिमिरें छगू चीन नीतिया सिद्धान्तयात दृढतापूर्वक पालना यायेगु नापं थुकिइ नेपाःया धिसिलाःगु प्रतिबद्धता दयावयाच्वंगु धकाः धयादीगु दु।

नेपाः व चीन दथुइ कूटनीतिक सम्बन्ध नीस्वंगु ७० क्वःगु वार्षिकोत्सव नापं चिनियाँ न्हूदँ २०२५ या झ्वलय् चिनियाँ दूतावासं बिहीबाः थन ग्वसाः ग्वःगु ज्याझ्वलय् वय्कलं चीन ताःई न्ह्यःनिसें नेपाःया छगू भर दूगु व महत्त्वपूर्ण विकास साझेदार देय् कथं दयाच्वंगु धकाः धयादिल। “चिनियाँ सरकार व जनतातय्गुपाखें नेपाःया विकासया कुतलय् बियावया च्वंगु ग्वाहालि व मंकाः ज्याया निंतिं जिपिं आभारी दु।

नेपाः व चीन दथुइ सलंसः दँ पुलांगु लिसें लिक्क लाःगु, मित्रवत् व सहयोगात्मक सम्बन्ध दयावयाच्वंगु दु”, वय्कलं धयादिल, “झीगु सम्बन्ध दुग्यंगु, सद्भावपूर्ण व बहुआयामिक जू, गुगु थवंथः भलसाया धिसिलाःगु जगय् निर्माण जूगु खः। भौगोलिक व सांस्कृतिक समानतातय्गु नापं जनस्तरया सम्बन्धं झीगु निगूपक्षीय सम्बन्धयात अझ क्वातुकाः यंकाच्वंगु दु।” सभामुख घिमिरें निगू देय्दथुइ दयाच्वंगु आर्थिक, सामाजिक नापं सांस्कृतिक सम्बन्धयात अझ अप्वकेत थजाःगु ज्याझ्वलं तःधंगु योगदान बिइगु धयादिल । चिनियाँ परम्पराकथं थुगुसी ताहाया दँ जूगु कनादिसें वय्कलं थुगु न्हूदं चिनियाँ मित्रजनतय्त थप लसता, प्रगति व समृद्धि हइगु भलसा कयादिल।

न्हय्गू दशकन्ह्यः सन् १९५५ य् कूटनीतिक सम्बन्ध नीस्वने धुंका थुखे नेपाल–चीन दथुइया मैत्रीपूर्ण सम्बन्ध मद्दिक विकसित व सुदृढ जुयावया च्वंगु न्ह्यथनादिसें सभामुख घिमिरें पञ्चशीलपाखें निर्देशित झीगु निगूपक्षीय सम्बन्ध भिंगु छिमेकपन, थ वं थः साझेदारी व सम्मानया नापं अन्तर्राष्ट्रिय मूल्य व मान्यताया लिधंसाय् जूयाच्वंगु धयादिल। “झीपिंदथुइया थजाःगु सुमधुर सम्बन्धयात थप सुदृढ व क्वातुकाः यंकेत जिपिं न्ह्याबलें तत्पर जुयाच्वनागु दु”, वय्कलं धयादिल। नेपालं चीनलिसेया सम्बन्धयात उच्च महत्त्व बियावयाच्वंगु धयादिसें वय्कलं थवंथवय् उच्चस्तरीय भ्रमण नापं ज्याझ्वःतय्गु मद्दिक कालबिलपाखें झीसं निगूपक्षीय सम्बन्धयात तसकं प्रगति व गतिशीलता बिइफूगु न्ह्यथनादिल।

सन् २०१९ य् नेपालया उबलय्या राष्ट्रपति विद्यादेवी भण्डारीं यानादीगु चीनया राजकीय भ्रमण नापं उगु हे दँय् चिनियाँ राष्ट्रपति सी चिनफिङं यानादीगु नेपाःया  राजकीय भ्रमणं निगू देय्या सम्बन्धयात न्हूगु च्वकाय् थ्यंकेत महत्त्वपूर्ण योगदान ब्यूगु वय्कःया धापू खः। “नकतिनि धइथें डिसेम्बर २०२४ य् प्रधानमन्त्री केपी शर्मा ओलीं यानादीगु चीनया औपचारिक भ्रमणं नेपाल–चीन दथुइया मित्रवत् सम्बन्धयात अझ प्रगाढ व क्वातुकेत यक्व ग्वाहालि जूगु दु”, सभामुख घिमिरें धयादिल, “उगु औपचारिक भ्रमणया झ्वलय् जूगु महत्त्वपूर्ण निर्णय व सम्झौतातय्सं झीगु निगूपक्षीय सम्बन्ध व मंकाः ज्यायात न्हूगु गति बिइत लँपु क्यंगु दु।”

ज्याझ्वलय् नेपाःया निंतिं चिनियाँ राजदूत चेन सोङं लसकुस यानादिसें वंगु दँय् बिस्कंबिस्कं हाथ्या दूगु परिस्थितितय्गु सामना यानाः चीनं च्वन्ह्याःगु प्रगति याःगु धयादिल। नापं वय्कलं चिनियाँ कम्युनिष्ट पार्टीया केन्द्रीय नेतृत्वय्, विशेषगरी नायः सी चिनफिङया मार्गदर्शनय् चीनं जटिल अन्तर्राष्ट्रिय अवस्थाया दथुइ थःगु आर्थिक विकासयात सुनिश्चित याःगु खँ कनादिल।राजदूत चेनं नेपाःया प्रधानमन्त्री केपी शर्मा ओलीया चीन भ्रमणया झ्वलय् चीन–नेपाल रणनीतिक सहकारी साझेदारीयात न्ह्याकादिसें बेल्ट एण्ड रोड निर्माणयात मंकाःकथं प्रवद्र्धन यायेत, ग्वाहालि ढाँचा सम्झौताय् ल्हाःचिं तयादीगु न्ह्यथनादिल।

थुकिं विकास व समृद्धिया दिशाय् नेपाः व चीनदथुइया दीर्घकालीन मित्रताया रणनीतिक साझेदारीयात न्हूगु च्वकाय् थ्यंकूगु वय्कःया धापू खः। “निगू देय् दथुइ, त्रि–आयामिक कनेक्टिभिटी नेटवर्क निर्माणं गति कयाच्वंगु दु, १४ परम्परागत सीमा बनेज्या नाका पूवंक हे चालेधुंकूगु दु व वाय् ४८ गू तप्यंक हवाई उडान जुयावया च्वंगु दु”, वय्कलं धयादिल, “निगू देय्या मित्रत पर्यटनया निंतिं चाःह्यू वयेगु, नेपालय् लगानी यायेत व बनेज्या यायेत यक्व चिनियाँ उद्यमीत वइगु व फयांफक्व अप्वः नेपाःया सामान चीनय् निकासी जुया च्वंगु खनाः जिमित लसता जूगु दु।” 

Categorized in राष्ट्रिय