प्रधानमन्त्री केपी शर्मा ओलीं पाल्पाया तिनाउ गाउँपालिकाया दोभानय् च्वंगु प्रशासकीय भवनया थौं ‘भर्चुअल’ माध्यमंं उलेज्या यानादीगु दु।

प्रधानमन्त्री ओलीं ज्याझ्वः जूगु थासय् वनाः उलेज्या यायेगु प्रबल इच्छा दःसां नं वय्कःया स्वास्थ्य स्थितिया हुनिं वयेमफूगु धासें न्हूगु भवनपाखें जनतायात अप्वः सेवा बिइगुया नापनापं विकास निर्माणया ज्याय् अझ नं न्ह्यावने फयेमाः धकाः मनंतुनादिल।

पाल्पाया विकास निर्माणया अभियानयात अझं तच्वयेकेत वय्कलं इनाप यानादिल। प्रधानमन्त्री ओलीं सरकार हिलिइ धइगु हल्ला अर्थहीन धकाः नं धयादिल। सरकार हिलिइ धयाः अस्थिरता ब्वलंकेत स्वयाच्वंपिं तत्वतय्सं याःगु हल्लाया ल्यूल्यू मवनेत वय्कलं इनाप यानादिल।

“नेपाल कम्युनिष्ट पार्टी (एमाले) व नेपाली कांग्रेसनापया थ्व सरकार २०८४ या निर्वाचन तक छधिइ जुयाः न्हापाया सहमति कथं न्ह्यावनी,” वय्कलं धयादिल – “छुं मनूतय्सं विकासया ज्या जूगु न्यने मयःयाः विकास विरोधी ज्या यानाच्वंगुलिं नं अजाःगु खँया अर्थ मदु।”

Categorized in राष्ट्रिय