फेन्सी व्यवसायी संघ, नेपालं येँया खुसिबुँइ ‘फलफूल चोक (पहिको चोक) य् स्वक्वः सतक महोत्सव’ तःजिक याःगु दु।

फेन्सी व्यवसायी संघ, नेपालया अध्यक्ष रोशन श्रेष्ठया सभाध्यक्षताय् जुगु उगु ज्याझ्वलय् मूपाहाँ कथं येँ महानगरपालिकाया उपमेयर सुनिता डंगोलं ब्बति कयादीगु खः। मूपाहाँ उपमेयर डंगोलं थज्यागु सतक महोत्सवं व्यवसायी दथुइ छप्प जुइगु भावना ब्बलनिगु नाप ग्राहकपि तक लाभान्वित जुइ धका धयादीगु खः।

संघया सल्लाहाकार चित्र भुजेल न्ह्याकादीगु उगु ज्याझ्वलय् संस्थाया उपाध्यक्ष निरेश शाहीं लशकुस यानादीगुलि संस्थाया संरक्षक नाप संस्थापक सचिव राजेन्द्र श्रेष्ठं संघ स्थापनाया मर्म व महत्वबारे खँ तयादीसे संघया स्थापना जुगु महत्वया विषय जुगु व संघं प्रभावकारी ज्याया निरन्तरता याना वनेमाः धका धयादीगु खः।

उगु ज्याझ्वलय् संघयात मदिक्क ग्वहालि याना वयाच्वंगुलि सनिरकुमार महर्जन व ‘पहिको युवा क्लव’ या सानुराजा महर्जनयात हने ज्या याःगु खः।

Categorized in राष्ट्रिय