प्रधानमन्त्री केपी शर्मा ओलीं सहिदतय्गु बलिदानया प्रेरणां ह्यूपाःया निंतिं ज्या यायेगु शक्ति बिइ धकाः धयादीगु दु।

राष्ट्रिय सहिद दिवस, २०८१ या झ्वलय् थौं नेपाल सरकारं सिंहदरबार लागाय् ग्वसाः ग्वःगु मूल समारोहया ज्याझ्वलय् प्रधानमन्त्री ओलीं राणाशासन अन्त्य यायेत व थी थी कालखण्डय् लोकतन्त्रया निंतिं सङ्घर्ष यानाः बलिदान बियादीपिं महान् सहिदतय्सं देय्या निंतिं ब्यूगु योगदान महत्वपूर्ण जूगु धयादीगु खः।

प्रधानमन्त्री ओलीं सहिदतय्गु हे बलिदान व प्रेरणां मुलुकय् सङ्घीय लोकतान्त्रिक गणतन्त्र वःगु व थुगु प्रणालीइ फुक्क शक्तिया स्रोत सार्वभौम जनता हे जूगु न्ह्यथनादिल। वय्कलं थुगु प्रणालीयात क्वातुकेत व दिगो यायेत थःपिं जुयाच्वनागु धयादिसें धात्थेंया व पूवंगु लोकतन्त्रया निंतिं जनताया प्रतिनिधितय्सं उगु भावना तयाः ज्या यायेमाःगुलिइ बः बियादिल।

वय्कलं राजनीतिक प्रणालीइ ह्यूपाः वय् धुंकूगुलिं आः तानाशाही शासनसत्ता बचे यायेत शान्तिपूर्ण आन्दोलन याःपिंत स्यायेगु अजाःगु शृङ्खला अन्त्य जुइधुंकूगु धयादिल। वय्कलं आः लोकतान्त्रिक प्रणाली व प्रक्रियायात रक्षा यायेत न्यायोचित कानुन कथं समृद्ध नेपाः व सुखी नेपाःमिया आज्जुइ आःया सरकार खुले जुयाः न्ह्याः वना च्वंगु दु धकाः नं धयादिल।

“झीसं तःधंगु सङ्घर्ष यानाः लोकतन्त्र स्थापना यानागु खः। लोकतन्त्र धइगु अराजकता मखु। थ्व विकसित, सभ्य व सुशासनं जाःगु प्रणाली खः। यदि व्यवस्थाय् वा शासकतय्के छुं नं ह्यूपाः वयेकेगु खः धाःसा लोकतान्त्रिक लँपु व विधिं यायेफइ तर लोकतन्त्रया नामय् देय्यात ब्वथलेगु व विकासया ज्याय् पंगः सृजना यायेगु स्वीकार्य जुइफइमखु”, प्रधानमन्त्री ओलीं धयादिल, “देय्या रक्षा, विकास व सुशासनया निंतिं थ्व सरकार न्ह्यचिलेत तत्पर दु। झीपिं सहिदं क्यनावंगु लँपुइ न्ह्याबलें अविचलित जुयाच्वने।”

ज्याझ्वलय् प्रतिनिधिसभाया उपप्रधानमन्त्रीत, मन्त्रीगण, प्रतिनिधिसभाया उपसभामुख, प्रधानमन्त्रीया मुख्य सल्लाहकार, सरकारया मुख्यसचिव, प्रधानसेनापति, सचिवत व विशष्ट मनूतय्सं नं ब्वति कयादीगु खः।थ्व स्वयां न्ह्यः प्रधानमन्त्री ओलीं लैनचौरय् च्वंगु सहिद स्मारक व सहिदगेटय् वनाः सहिदतय्त हनादीगु खः। नेपाल सरकार (मन्त्रिपरिषद्)या मङ्गलबाःया मुँज्यां थुगु दिवसयात राष्ट्रियस्तरय् न्यायेकेगु निर्णय याःगु खः।

Categorized in राष्ट्रिय